दिवाळीच्या पार्श्वभूमीवर परिवहन महामंडळाच्या पुणे विभागाने एकूण 598 जादा एसटी बस सोडण्याचा निर्णय घेतला आहे. या बस 15 ऑक्टोबर ते 5 नोव्हेंबर या कालावधीत धावणार आहेत. त्यामुळे हजारो प्रवाशांना आपल्या गावी जाण्यासाठी सोयीस्कर व्यवस्था उपलब्ध होणार आहे.
यंदा पहिल्यांदाच पिंपरी-चिंचवड आगारातून विशेष एसटी बस सेवा सुरू करण्यात येत आहे. याशिवाय शिवाजीनगर आणि स्वारगेट या प्रमुख आगारांमधूनही जादा बस सोडण्यात येणार आहेत.
advertisement
पुणे विभागातून अशी असेल बसची सोय
शिवाजीनगर आगारातून: 80 बस
स्वारगेट आगारातून: 112 बस
पिंपरी-चिंचवड आगारातून: 396 बस
अशा प्रकारे एकूण 598 अतिरिक्त बस प्रवाशांच्या सेवेत उपलब्ध होणार आहेत. या बसद्वारे कोल्हापूर, सांगली, सातारा, सोलापूर, अहमदनगर, नाशिक, लातूर, बीड, परभणी, अकोला, आणि नागपूर अशा विविध जिल्ह्यांकडे सेवा पुरवली जाणार आहे.
या विशेष बस सेवेमुळे दिवाळीसाठी गावी जाणाऱ्या प्रवाशांना मोठा दिलासा मिळणार आहे. गर्दीच्या काळात रेल्वे किंवा खासगी प्रवासाच्या पर्यायांवर ताण येत असतो. परंतु एसटी महामंडळाने घेतलेल्या या निर्णयामुळे सर्वसामान्य प्रवाशांना सुरक्षित आणि परवडणारा प्रवासाचा पर्याय उपलब्ध होईल.
महामंडळाने जाहीर केले आहे की, या बसचे ऑनलाइन आरक्षण आता सुरू झाले आहे. प्रवासी एसटी महामंडळाच्या अधिकृत संकेतस्थळावर (https://msrtc.maharashtra.gov.in) किंवा मोबाइल अॅपवरून आपल्या प्रवासाचे तिकीट सहज बुक करू शकतात. गर्दी टाळण्यासाठी प्रवाशांनी आधीच आरक्षण करण्याचे आवाहनही करण्यात आले आहे.
दिवाळीच्या या काळात रस्त्यांवरील गर्दी वाढण्याची शक्यता असल्याने प्रवाशांनी संयम बाळगावा आणि वाहतुकीचे नियम पाळावेत असेही आवाहन करण्यात आले आहे. एकंदरीत परिवहन महामंडळाच्या या निर्णयामुळे नागरिकांची दिवाळी अधिक आनंददायी आणि सुखकर होणार आहे.