Railway Timetable : 'वेटिंग लिस्ट'ची चिंता सोडा! पनवेल-चिपळूण दरम्यान विशेष रेल्वे सेवा सुरू; पाहा संपूर्ण वेळापत्रक आणि थांबे

गाडी क्रमांक 01159 अनारक्षित पनवेल-चिपळूण विशेष रेल्वेगाडी 3 ऑक्टोबरपासून 26 ऑक्टोबरपर्यंत प्रत्येक शुक्रवार, शनिवार आणि रविवार या दिवशी धावणार आहे. ही गाडी पनवेलहून दुपारी 4.40 वाजता सुटेल आणि चिपळूण येथे रात्री 9.55 वाजता पोहोचेल.

पनवेल ते चिपळूणदरम्यान या विशेष रेल्वेगाडीला सोमाटणे, आपटा, जिते, पेण, कासू, नागोठणे, रोहा, कोलाड, इंदापूर, माणगाव, गोरेगाव रोड, वीर, सापे वामणे, करंजाडी, विन्हेरे, दिवाणखवटी, कळंबणी बुद्रुक, खेड आणि अंजनी या स्थानकांवर थांबा असेल.

या विशेष गाडीत एकूण 8 मेमू डबे असतील. प्रवाशांची वाढती गर्दी लक्षात घेऊन रेल्वे प्रशासनाने ही विशेष गाडी चालवण्याचा निर्णय घेतला आहे. मध्य रेल्वेच्या मते या अतिरिक्त गाड्यांमुळे कोकणमार्गावर जाणाऱ्या प्रवाशांना मोठा दिलासा मिळणार आहे. दरवर्षीप्रमाणे यंदाही दिवाळीच्या काळात कोकणात जाणाऱ्या प्रवाशांची संख्या वाढते. त्यामुळे या अतिरिक्त गाड्यांमुळे गर्दीचे नियोजन सुलभ होईल आणि प्रवाशांना वेळेवर प्रवास करता येईल.