पुण्यातील चांदणी चौक परिसरात वाहतूक कोंडी, वाहतुकीचा प्रश्न कायमच ऐरणीवर असल्याचे चित्र आहे. त्यातच काही वेळेस अपघातसदृष्य स्थिती निर्माण होते. गुरुवारी झालेल्या विचित्र अपघाताने चांदणी चौकातील वाहतूक नियमनाचा मुद्दा चर्चेत आला आहे.
मिळालेल्या माहितीनुसार, ट्रक चांदणी चौकात आला असताना अचानक समोर एक वाहन आले. त्यामुळे चालकाने तातडीने ब्रेक दाबले. मात्र ट्रॉलीमध्ये भरलेली लोखंडी सळई जोरात पुढे सरकले. या लोखंडी सळई थेट केबिनमध्ये घुसले. यात चालक गंभीर जखमी झाला आणि त्याचा जागीच मृत्यू झाला.
advertisement
पुण्यातील चांदणी चौकात काल रात्री आठच्या सुमारास एक भीषण अपघात घडला. मृत चालक मूळचा राजस्थानचा असून, तो मुंबईहून बंगळुरूकडे ट्रक घेऊन जात होता. घटनेनंतर परिसरात एकच खळबळ उडाली. अपघात इतका भयावह होता की ट्रकच्या केबिनचा समोरचा भाग चक्काचूर झाला होता. घटनास्थळी पोलीस तात्काळ दाखल झाले. मृतदेह शवविच्छेदनासाठी ससून रुग्णालयात पाठवण्यात आला आहे.
या अपघातामुळे काही काळ वाहतूक विस्कळीत झाली होती. चांदणी चौक हा आधीच वाहतूकदृष्ट्या गुंतागुंतीचा परिसर असल्याने या दुर्घटनेचा परिणाम संपूर्ण वाहतुकीवर जाणवला. दरम्यान, पोलिसांनी घटनेचा तपास सुरू केला आहे.