दिवाळी सणासाठी एसटी बससेवा
दिवाळी सणानिमित्त प्रवाशांची गर्दी लक्षात घेऊन राज्य परिवहन महामंडळाने (एसटी) पुणे विभागातील स्वारगेट, वाकडेवाडी (शिवाजीनगर) आणि वल्लभनगर (पिंपरी-चिंचवड) या स्थानकांमधून 589 अतिरिक्त फेऱ्या राबवल्या. त्यामुळे 15 ते 18 ऑक्टोबर या चार दिवसांत एकूण सहा हजार फेऱ्या पूर्ण झाल्या. अडीच लाखाहून अधिक प्रवाशांनी या कालावधीत बससेवा वापरली. विशेषत: वाकडेवाडी बस स्थानकावरून नाशिक, छत्रपती संभाजीनगर, बीड, अहिल्यानगर, लातूर, धाराशिव आणि परभणीसाठी 900 फेऱ्यांची वाढ करण्यात आली.
advertisement
मध्य रेल्वेचं दिवाळी गिफ्ट! पुणे, मुंबईतून धावणार विशेष रेल्वे, कधी आणि कुठे? पाहा वेळापत्रक
मागील वर्षीच्या तुलनेत यंदा फेऱ्यांमध्ये मोठी वाढ
गेल्या वर्षी वाकडेवाडी (शिवाजीनगर) स्थानकावरून 600 फेऱ्या होत्या, तर यावर्षी प्रवाशांच्या मागणीच्या आधारे 900 फेऱ्या करण्यात आल्या. स्वारगेट स्थानकावरून यंदा 750 फेऱ्या झाल्या आहेत. मागील वर्षी येथे फक्त 450 फेऱ्या होत्या. या स्थानकातून कोल्हापूर, सातारा, सोलापूर आणि सांगलीकडे बस सेवा चालवली जाते. वल्लभनगर (पिंपरी-चिंचवड) स्थानकातूनही नाशिक, धुळे, जळगाव, नागपूर तसेच मराठवाड्यातील बीड, जालना, परभणी, जिंतूर, अंबाजोगाई, माजलगाव, हिंगोली, यवतमाळ आणि वर्धा जिल्ह्यांमध्ये 650 पेक्षा अधिक फेऱ्या राबवल्या आहेत. प्रवाशांच्या मागणीच्या आधारे फेऱ्या वाढवल्या असल्याचे पुणे एसटी महामंडळाचे विभाग नियंत्रक अरुण सिया यांनी सांगितलं.
पुणे एसटी महामंडळाचे विभाग नियंत्रक अरुण सिया यांनी सांगितलं की, दिवाळी सणानिमित्त दरवाढ न करता अतिरिक्त 589 गाड्या राबवल्याने प्रवाशांकडून सकारात्मक प्रतिसाद मिळाला. विशेषत: खासगी वाहतूक करणाऱ्यांकडून अतिरिक्त दर आकारण्यात आल्याने प्रवाशांनी 'एसटी'ला प्राधान्य दिले आहे. यंदा स्वारगेट, वाकडेवाडी (शिवाजीनगर) आणि वल्लभनगर (पिंपरी-चिंचवड) स्थानकांमधून फेऱ्या वाढवल्या आहेत.