पुणे-नाशिक महामार्गावर धावत्या एसटी बसमध्येच चालक-वाहकाला बेदम मारहाण; प्रवाशांचा जीव टांगणीला

चालत्या बसमध्ये घुसून मारहाण

ही घटना पुणे-नाशिक महामार्गावर खेड घाटाच्या हद्दीत घडली. मंचर डेपोची एसटी बस खेड येथून मंचरच्या दिशेने जात असताना, काही तरुणांनी रस्त्यात थार गाडी आडवी लावून बस थांबवली. बस थांबताच, दोन ते तीन तरुण तातडीने बसमध्ये घुसले.

त्यांनी कोणतीही विचारपूस न करता, थेट बसचे चालक आणि वाहक (कंडक्टर) यांना शिवीगाळ करत बेदम मारहाण करण्यास सुरुवात केली.

advertisement

बसमध्ये मारहाण सुरू असताना, चालक आणि वाहक स्वतःला वाचवण्याचा प्रयत्न करत होते. ज्यामुळे चालत्या बसचा ताबा सुटण्याची भीती निर्माण झाली होती आणि बसमधील सर्व प्रवाशांचे प्राण धोक्यात आले होते.

Pune Crime: जीव घ्यायला गेला, पण स्वतःच जीव गमावला; कामशेतजवळ गोळीबारात हल्लेखोराचाच मृत्यू

मारहाणीचा व्हिडीओ व्हायरल

मारहाणीचा हा संपूर्ण थरार बसमधील एका प्रवाशाने आपल्या मोबाइल कॅमेरात कैद केला. हा व्हिडीओ सोशल मीडियावर मोठ्या प्रमाणावर व्हायरल झाला असून, सार्वजनिक मालमत्तेत अशाप्रकारे गुंडगिरी होत असल्याने प्रवाशांमध्ये दहशत आणि संताप पसरला आहे. या मारहाणीमागील नक्की कारण अद्याप अस्पष्ट आहे. हा प्रकार रॅश ड्रायव्हिंग किंवा रस्त्यावरील वादातून घडला असावा, असा प्राथमिक अंदाज व्यक्त होत आहे.

मंचर पोलिसांत गुन्हा दाखल नाही

एवढी गंभीर घटना घडल्यानंतरही, ही बातमी देईपर्यंत मंचर पोलीस ठाण्यात अद्याप कोणताही गुन्हा दाखल करण्यात आलेला नव्हता. मात्र, व्हायरल झालेल्या व्हिडीओच्या आधारे पोलिसांनी स्वतःहून या घटनेची दखल घेऊन तातडीने तपास करावा, अशी मागणी नागरिकांकडून जोर धरत आहे. या घटनेमुळे राज्य परिवहन महामंडळाच्या (MSRTC) कर्मचाऱ्यांच्या सुरक्षिततेचा आणि महामार्गावरील गुंडगिरीचा प्रश्न ऐरणीवर आला आहे.