Pune News: मध्यरात्रीच येऊ लागले मोठमोठे आवाज; खडबडून जागे झाले झोपलेले पुणेकर, पुण्यात नेमकं काय घडलं?

बुधवारी मध्यरात्री जेव्हा संपूर्ण पुणे शहर गाढ झोपेत होतं, तेव्हा अचानक आकाशातून येणाऱ्या प्रचंड आवाजांनी पुणेकरांना घाम फोडला

पुणे: बुधवारी मध्यरात्री जेव्हा संपूर्ण पुणे शहर गाढ झोपेत होतं, तेव्हा अचानक आकाशातून येणाऱ्या प्रचंड आवाजांनी पुणेकरांना घाम फोडला. दीड ते दोनच्या सुमारास झालेल्या या 'विमानांच्या गर्जनेने' कोथरूडपासून लोहगावपर्यंतचे नागरिक खडबडून जागे झाले. पुण्याच्या आकाशात नेमकं काय सुरू आहे, युद्धजन्य परिस्थिती आहे की काय? अशा अनेक शंकांनी पुणेकरांमध्ये काही काळ भीती आणि संभ्रमाचे वातावरण निर्माण झाले होते.

नेमकं काय घडलं?

मध्यरात्री साधारण दीड ते दोनच्या दरम्यान भारतीय हवाई दलाच्या 'सुखोई-३० एमकेआय' (Sukhoi-30 MKI) या शक्तिशाली लढाऊ विमानांनी पुण्याच्या आकाशात उड्डाणे केली. एकामागून एक अशा चार लढाऊ विमानांनी अत्यंत कमी उंचीवरून झेप घेतल्याने परिसरातील खिडक्यांच्या काचाही हादरल्या. विशेषतः विमाननगर, लोहगाव, धानोरी आणि चक्क कोथरूड परिसरातही या विमानांचा कानठळ्या बसवणारा आवाज घुमला.

सोशल मीडियावर रंगली चर्चा

अचानक झालेल्या या आवाजामुळे पुणेकर अस्वस्थ झाले आणि ट्विटर (X) आणि व्हॉट्सॲपवर माहितीची देवाणघेवाण सुरू झाली. "इतक्या रात्री विमाने सराव का करत आहेत?", "विमाने इतक्या कमी उंचीवर का आहेत?" अशा प्रश्नांचा भडीमार झाला. काहींनी याला 'हवाई थरार' म्हटले तर काहींनी भीती व्यक्त केली.

हवाई दलाचे स्पष्टीकरण: घाबरण्याचे कारण नाही

नागरिकांमधील वाढता संभ्रम पाहून लोहगाव हवाई दल तळाच्या सूत्रांनी माहिती दिली की, ही कोणतीही आपत्कालीन परिस्थिती नव्हती. हवाई दलाची ही एक 'नियमित सराव मोहीम' होती. रात्रीच्या वेळी प्रतिकूल परिस्थितीत उड्डाण करण्याचा सराव करण्यासाठी ही विमाने आकाशात झेपावली होती.

टॉप व्हिडीओज

सर्व पहा

आले, डाळिंब तेजीत, हळदीनंही मार्केट खाल्लं, कुठं मिळाला सर्वाधिक भाव?

सर्व पहा

पुणे हे भारतीय हवाई दलाचे एक महत्त्वाचे केंद्र असल्याने अशा प्रकारचे सराव अधूनमधून केले जातात, मात्र मध्यरात्री विमाने खूपच कमी उंचीवर असल्याने आवाजाची तीव्रता जास्त जाणवली आणि शांततेत असलेल्या पुणेकरांची झोप उडाली.