TRENDING:
पुणे: गेल्या काही वर्षांत लिव्ह-इन रिलेशनशिपचे प्रमाण मोठ्या प्रमाणात वाढत आहे. नुकत्याच येरवडा परिसरात लिव्ह-इनमध्ये राहणाऱ्या महिलेचा किरकोळ भांडणातून मृत्यू झाल्याची धक्कादायक घटना समोर आली. या प्रकरणामुळे लिव्ह-इन रिलेशनशिपमधील नात्यांचा मुद्दा पुन्हा एकदा ऐरणीवर आला आहे. स्वतंत्रपणे निर्णय घेण्याची इच्छा यामुळे अनेक तरुण हा पर्याय निवडतात. लग्नाआधी एकत्र राहिल्यामुळे भविष्यात नातं टिकेल का नाही? याचा अंदाज घेण्यासाठी सध्याची पिढी लिव्ह-इन रिलेशनशिपकडे वळत आहे. मात्र काही प्रकरणांमध्ये त्याचे उलट परिणामही दिसून येत आहेत.
advertisement
याच पार्श्वभूमीवर लिव्ह-इन रिलेशनशिपबद्दल ॲडव्होकेट गायत्री कांबळे यांनी 'लोकल 18'ला मुलाखत दिली आहे. ॲडव्होकेट गायत्री कांबळे यांनी सांगितलं की "आजची तरुण पिढी लवकर लग्न करण्यापेक्षा एकमेकांना समजून घेण्याला अधिक प्राधान्य देताना दिसत आहे. लग्नानंतर नातं टिकेल का याचा अंदाज घेण्यासाठी अनेक तरुण- तरूणी लिव्ह-इन रिलेशनशिपचा पर्याय निवडताना दिसत आहे. लिव्ह-इन रिलेशनशिपमध्ये दोघांना प्रायव्हसी, वैयक्तिक स्वातंत्र्य आणि निर्णय घेण्याची मोकळीक मिळते. पारंपरिक विवाहात जाणवणारा सामाजिक दबावही या नात्यात कमी असतो. त्यामुळे लिव्ह-इन रिलेशनशिपचं प्रमाण वाढत आहे."
"पण लिव्ह-इन रिलेशनशिप मध्ये येत असताना आजच्या तरूण- तरूणींना अनेक गोष्टींबाबत सतर्क राहण महत्वाचं आहे. कारण गेल्या काही वर्षांपासून लिव्ह-इन रिलेशनशिपमुळे हिंसाचाराच्या घटनांमध्ये मोठ्या प्रमाणात वाढ होत आहे. फक्त एकमेकांना समजून घेण्यासाठी लिव्ह- इन रिलेशनशिपमध्ये राहण्याचा निर्णय चुकीचा ठरू शकतो. लिव्ह-इन रिलेशनशिपमध्ये राहत असताना समोरच्या व्यक्तीची संपूर्ण माहिती, पार्श्वभूमी आणि स्वभाव जाणून घेणे अत्यंत आवश्यक आहे. अशा नात्यात सुरक्षितता आणि विश्वास या गोष्टींकडे दुर्लक्ष करता कामा नये.", असा सल्ला ॲडव्होकेट गायत्री कांबळे यांनी आजच्या तरूण- तरूणींना दिला आहे.