सचिन पायगुडे हा घरामध्ये टीव्ही पाहत होता, तेव्हा वडिलांनी सचिनला टीव्ही बंद करून डोळ्यात आयड्रॉप्स टाकायला सांगितलं, पण या क्षुल्लक कारणावरून बाप आणि मुलामध्ये वाद सुरू झाला आणि या वादाने हिंसक वळण घेतले.
बापावरच चाकूने सपासप वार
रागाच्या भरात सचिन पायगुडे स्वयंपाकघरात धावत गेला आणि चाकू घेऊन आला. यानंतर त्याने तानाजी पायगुडे यांच्या चेहऱ्यावर आणि गळ्यावर चाकूने वारंवार वार केले. या हल्ल्यात तानाजी पायगुडे गंभीर जखमी झाले आणि त्यांचा घरामध्येच मृत्यू झाला. या घटनेमुळे पायगुडे यांचे शेजारी आणि जय भवानी नगरमध्ये भीतीचं वातावरण आहे.
advertisement
हत्येच्या घटनेनंतर कोथरूड पोलिसांना तातडीने कळवण्यात आले, त्यानंतर पोलीस घटनास्थळी पोहोचले. प्राथमिक चौकशीनंतर पोलिसांनी सचिन पायगुडेला अटक केली आहे. तानाजी पायगुडे यांची पत्नी सुमन पायगुडे यांनी तक्रार दिल्यानंतर पोलिसांनी सचिन पायगुडेविरोधात हत्येचा गुन्हा दाखल केला आहे.
पुण्याच्या कोथरूडमध्ये घडलेल्या या धक्कादायक कृत्यामागील संपूर्ण तपशील आणि मूळ कारणं उघड करण्यासाठी पोलिसांनी सखोल चौकशी सुरू केली आहे, पण दसऱ्याच्या सणाच्या दिवशी घडलेल्या या घटनेमुळे जय भवानी नगर परिसर हादरला आहे.