रश्मिका मंदान्नाच्या इअरमफचा ट्रेंड पुण्यात जोरात, लाडक्या अभिनेत्रीचं पाहून तरूणाईत भलती क्रेझ

रश्मिकाने वापरलेले आकर्षक आणि स्टायलिश इअरमफ सोशल मीडियावर व्हायरल झाल्यानंतर अनेक तरुण- तरुणी आता त्याच धर्तीवरचे इअरमफ खरेदी करताना दिसत आहेत. पुण्यातील तुळशीबागेसह विविध बाजारपेठांमध्ये याची अचानक वाढलेली मागणी पाहायला मिळत आहे. खरेदीसाठी गर्दी होत असल्याने विक्रेत्यांमध्येही उत्साहाचे वातावरण आहे. तुळशीबाग परिसरात गेल्या 28 वर्षांपासून व्यवसाय करणारे विक्रेते अमर गायकवाड म्हणाले, गेल्या काही वर्षांपासून इअरमफ बाजारात उपलब्ध आहेत. मात्र यावर्षी रश्मिकाच्या पोस्टनंतर या वस्तूची लोकप्रियता प्रचंड वाढली आहे. तरुणाई फॅशनसोबतच थंडीत संरक्षण मिळावे म्हणून मोठ्या प्रमाणावर इअरमफ खरेदी करत आहे.

advertisement

सध्या बाजारात इअरमफचे 5 ते 6 वेगवेगळे प्रकार उपलब्ध आहेत. त्यात लाबुबू, टेडी बेअर, लाईटिंग इअरमफ आणि विविध कार्टून डिझाइन्स असलेले मॉडेल्स विशेष लोकप्रिय ठरत आहेत. मऊ आणि सौम्य फर्बनी तयार करण्यात आलेले हे इअरमफ थंडीत कानांना उत्तम संरक्षण देतात आणि लूकलाही स्टायलिश दिसतात. 250 ते 300 रुपयांदरम्यान असलेले हे इअरमफ सध्या सर्वत्र कमालीचे चर्चेत आले आहेत. किफायतशीर किंमत, आकर्षक डिझाईन्स आणि सेलिब्रिटी फॅशनचा प्रभाव या सगळ्यांच्या एकत्रित परिणामामुळे हा ट्रेंड झपाट्याने वाढत असल्याचे व्यापाऱ्यांचे म्हणणे आहे. थंडी जसजशी वाढत आहे तसतसा या इअरमफचा ट्रेंड अजून रंगत जाईल असा अंदाज बाजारपेठेतील दुकानदारांनी व्यक्त केला आहे. फॅशन आणि फंक्शन यांचा उत्तम मेळ घालणारा हा ट्रेंड पुणेकर तरुणाईने चांगलाच उचलून धरल्याचे चित्र सध्या सर्वत्र पाहायला मिळत आहे.