TRENDING:
धुळे जिल्ह्यातून पुण्यात नोकरीनिमित्त आलेल्या यशवंत कण्हेरे यांनी पुण्यातील बजाज ऑटो कंपनीत तब्बल 26 वर्षे सेवा बजावली. निवृत्तीनंतर त्यांनी विविध सामाजिक उपक्रमांमध्ये सहभाग घेतला. याच काळात त्यांची भेट आरोग्याधिकारी प्रभाकर तावरे यांच्याशी झाली. तावरे यांनी त्यांना संत गाडगे बाबा यांच्या कार्यावर आधारित पुस्तके भेट दिली. ही पुस्तके वाचल्यानंतर संत गाडगे बाबांच्या स्वच्छतेच्या कार्याचा त्यांच्यावर खोल प्रभाव पडला. त्यानंतर उर्वरित आयुष्य स्वच्छता अभियानासाठी समर्पित करण्याचा त्यांनी निर्धार केला. त्या दिवसापासून ते ज्या ठिकाणी जातात, त्या परिसराची स्वच्छता करण्याचे काम सातत्याने करत आहेत.
advertisement
पायी नर्मदा परिक्रमा आणि आषाढी वारीतील सेवा
5 डिसेंबर 2023 ते 17 मार्च 2024 या कालावधीत यशवंत कण्हेरे यांनी तब्बल 3700 किलोमीटरची पायी नर्मदा परिक्रमा पूर्ण केली. या संपूर्ण प्रवासादरम्यान त्यांनी मुक्कामाच्या प्रत्येक ठिकाणी स्वच्छता अभियान राबवत जनजागृती केली. गेल्या 11 वर्षांपासून ते आषाढी वारीमध्ये सहभागी होत असून वारीदरम्यानही स्वच्छता मोहिम राबवतात. 23 फेब्रुवारी 2025 रोजी त्यांनी मोटारसायकलवरून संपूर्ण महाराष्ट्राची स्वच्छता जनजागृती परिक्रमा सुरू केली. 66 दिवसांत 36 जिल्ह्यांमध्ये 4610 किलोमीटरचा प्रवास करत त्यांनी अनेक शाळांना भेटी दिल्या आणि विद्यार्थ्यांना स्वच्छतेचे महत्त्व पटवून दिले. वाराणसी येथील काशी विश्वनाथ मंदिर येथे तीन वेळा जाऊन घाट परिसराची स्वच्छता केली आहे. तसेच अयोध्येत प्रभू रामचंद्र यांच्या दर्शनासाठी गेले असता तेथील रस्त्यांची स्वच्छता केली.
स्वच्छता ब्रँड ॲम्बेसिडर
पिंपरी-चिंचवड महानगरपालिका यांनी 2024 ते 2025 या कालावधीत त्यांची स्वच्छता ब्रँड ॲम्बेसेडर म्हणून नियुक्ती करण्यात आली होती. शहराला स्वच्छतेत प्रथम क्रमांक मिळवून देण्यात त्यांच्या कार्याचा मोलाचा वाटा ठरला. यासाठी त्यांना दिवंगत उपमुख्यमंत्री अजित पवार यांच्या हस्ते सन्मानपत्र देण्यात आले होते. स्वच्छता ही प्रत्येक नागरिकाची जबाबदारी आहे, असा संदेश देत कण्हेरे आजही स्वखर्चाने रस्ते, सार्वजनिक ठिकाणे आणि मंदिर परिसर स्वच्छ ठेवण्याचे काम करत आहेत. त्यांच्या कार्यातून अनेक तरुण प्रेरित होऊन स्वच्छता मोहिमेत सहभागी होत आहेत.