TRENDING:
क्रिकेट ऑस्ट्रेलियाच्या मेडिकल टीमने कमिन्स आणि हेजलवूड यांना आयपीएल खेळण्यासाठी एनओसी देण्यात आलेलं नाही. मेडिकल टीमकडून एनओसी मिळाल्यानंतर दोघंही काही सामने खेळू शकतात.
कमिन्स-हेजलवूडचं रिहॅब
हिंदुस्तान टाईम्सच्या रिपोर्टनुसार दोन्ही स्टार खेळाडूंची रिहॅबिलिटेशन सुरू आहे, तसंच दोघांचंही आयपीएलच्या पहिल्या सामन्याआधी फिट होणं अशक्य आहे. 'मागच्या आठवड्यापेक्षा जास्त काहीही बदललेलं नाही. फिजियोकडून अजूनही त्यांना मंजुरी मिळालेली नाही. दोघांचंही रिहॅब सुरू आहे. हेजलवूड आणि कमिन्स सुरूवातीच्या काही सामन्यांमध्ये खेळू शकणार नाहीत. स्पर्धेच्या पुढच्या टप्प्यात दोघं काही मॅच खेळतील, अशी अपेक्षा आहे, पण तेदेखील मंजुरीवर अवलंबून आहे. मंजुरी मिळाली की दोघं भारतात येण्यासाठी रवाना होतील', अशी माहिती सूत्रांनी दिली आहे.
advertisement
पॅट कमिन्सने डिसेंबर 2025 मध्ये इंग्लंडविरुद्ध ऍडलेडमध्ये शेवटची मॅच खेळली होती. या सामन्याच्या दोन्ही इनिंगमध्ये कमिन्सने 3-3 विकेट घेतल्या होत्या. तर हेजलवूड मागच्या आयपीएल मोसमात आरसीबीचा सर्वाधिक विकेट घेणारा बॉलर होता. नोव्हेंबर 2025 मध्ये हेजलवूड त्याची स्थानिक टीम न्यू साऊथ वेल्सकडून शेवटची मॅच खेळला, यानंतर दुखापतीमुळे हेजलवूड ऍशेसच्या पाचही मॅच खेळू शकला नाही.
नुकत्याच झालेल्या टी-20 वर्ल्ड कपमध्येही कमिन्स आणि हेजलवूड खेळले नव्हते. आयपीएलमध्ये पॅट कमिन्स हा सनरायजर्स हैदराबादचा कॅप्टन आहे, त्यामुळे कमिन्सच्या गैरहजेरीमध्ये हैदराबादला नवा कॅप्टन शोधावा लागणार आहे. हेजलवूडच्या गैरहजेरीमध्ये आरसीबीकडून न्यूझीलंडचा जेकब डफी किंवा श्रीलंकेच्या नुवान तुषाराला पहिल्या सामन्यात संधी मिळण्याची शक्यता आहे. तर कमिन्सच्या जागी इंग्लंडचा ब्रायडन कार्स किंवा श्रीलंकेचा एहसान मलिंगा सुरूवातीच्या सामन्यांमध्ये सनरायजर्स हैदराबादकडून खेळू शकतो.