गर्दी नियंत्रणात आणण्यासाठी पोलिसांकडून सौम्य लाठीचार्ज!
टीम इंडियाच्या विजयाची रॅली आज नरिमन पॉइंट येथे निघणार असून नरिमन पॉइंट्स येथील रस्ते क्रिकेट प्रेमींनी भरून गेले आहेत. अशातच एका हॉटेल बाहेर टीम इंडिया उतरणार असून या हॉटेल बाहेर क्रिकेट प्रेमी खचखचून भरलेत. आपला आवडत्या खेळाडूची एक झलक पाहण्यासाठी नागरिकांनी येथे प्रचंड गर्दी केली असून गर्दीवर नियंत्रण आणण्यासाठी पोलिसांकडून लाठीचार्ज करण्यात आला.
advertisement
मरीन ड्राईव्ह परिसरात एवढा जनसागर लोटला आहे की रोड शोसाठी जी बस वापरण्यात येणार आहे तीच बस गर्दीत अडकली आहे. याच बसमधून टीम इंडियाची मिरवणूक निघणार आहे. मुंबईमध्ये पाऊस पडत असतानाही चाहते मोठ्या प्रमाणावर रस्त्यावर उतरले आहेत. मुंबई विमानतळावर आल्यानंतर भारतीय खेळाडूंच्या विमानाला फायर ब्रिगेडच्या गाड्यांनी पाणी उडवून सलामी दिली आहे.
वाचा - मरिन ड्राईव्हवर मुग्यांसारखी चाहत्यांची गर्दी अन् अ‍ॅम्बुलन्स आली आणि..
खेळाडूंवर बक्षिसांचा वर्षाव
29 जून रोजी दक्षिण आफ्रिकेचा पराभव करून भारताने T20 वर्ल्डकपवर दुसऱ्यांदा नाव कोरलं. तेव्हापासून भारतीय चाहते चॅम्पियन संघाच्या स्वागतासाठी उत्सुक आहेत. मायदेशी परतल्यानंतर भारतीय क्रिकेटपटूंवरही बक्षिसांचा वर्षाव होणार आहे. बीसीसीआयने 125 कोटी रुपयांचा बोनस जाहीर केला आहे. टीम इंडियाचा रोड शो झाल्यानंतर वानखेडे स्टेडियमवर बीसीसीआयकडून कार्यक्रमाचं आयोजन करण्यात आलं आहे. या कार्यक्रमात भारतीय खेळाडूंना 125 कोटी रुपयांचं बक्षीस दिलं जाणार आहे. या कार्यक्रमासाठीही वानखेडे स्टेडियम अवघ्या पाच ते सात मिनिटांमध्ये हाऊसफुल झालं आहे.