TRENDING:
महामेट्रो प्रशासनाकडून मिळालेल्या माहितीनुसार या पुलाचे मुख्य स्ट्रक्चरल आणि लाँचिंगचे काम पूर्ण झाले आहे. सध्या पुलावर फिनिशिंग, विद्युत रोषणाई, रेलिंग तसेच इतर अंतर्गत सजावटीची कामे सुरू आहेत. हा प्रकल्प डिसेंबर 2025 पर्यंत पूर्ण होणे अपेक्षित होते. मात्र, 2025 मध्ये झालेल्या लांबलेल्या पावसामुळे आणि नदीपात्रातील काही तांत्रिक अडचणींमुळे कामाला विलंब झाला.
advertisement
पुणे-सोलापूर महामार्गावर लोकांना अडवून धक्कादायक कांड, मग 1200 KM प्रवास, अखेर बेड्या
सध्या बाबा भिडे पूल वाहतुकीसाठी सुरू असून नागरिकांच्या गैरसोयी टाळण्यासाठी मेट्रो प्रशासनाने बहुतांश कामे रात्रीच्या वेळी करण्याचे नियोजन केले आहे. त्यामुळे दिवसा वाहनचालकांना वाहतुकीचा फारसा अडथळा जाणवत नाही. हा पादचारी पूल केबल-स्टेड प्रकारचा असून त्याची एकूण लांबी सुमारे 108 मीटर आणि रुंदी 8 मीटर आहे. या पुलाच्या उभारणीसाठी अंदाजे 25 कोटी रुपयांचा खर्च करण्यात आला आहे. नदीच्या नैसर्गिक प्रवाहाला कोणताही अडथळा येऊ नये, याची विशेष काळजी घेत पुलाचे डिझाइन तयार करण्यात आले आहे.
या पुलाचे सर्वात मोठे वैशिष्ट्य म्हणजे पादचाऱ्यांना थेट डेक्कन मेट्रो स्टेशनच्या कॉनकोर्स लेव्हलवर, म्हणजेच तिकीट खिडकी असलेल्या मजल्यावर थेट प्रवेश मिळणार आहे. त्यामुळे नारायण पेठ, शनिवार पेठ, लक्ष्मी रोड परिसरातील नागरिक, विद्यार्थी आणि प्रवाशांना मोठा दिलासा मिळणार आहे. पूर्वी पेठ भागातून डेक्कनकडे जाण्यासाठी 10 ते 15 मिनिटांचा वळसा घालावा लागत होता. आता मात्र केवळ 2 ते 3 मिनिटांच्या चालण्याने मेट्रो स्टेशन गाठणे शक्य होणार आहे.
भिडे पुलावर वाहनांची मोठी वर्दळ असते. स्वतंत्र पादचारी पूल उपलब्ध झाल्याने अपघातांचा धोका लक्षणीयरीत्या कमी होणार आहे. याआधी छत्रपती संभाजी उद्यान मेट्रो स्टेशन ते शनिवार पेठ दरम्यान असाच पादचारी पूल पूर्ण होऊन सुरू झाला आहे. आता बाबा भिडे पुलावरील हा पूल कार्यान्वित झाल्यानंतर नदीच्या दोन्ही बाजूंची मेट्रो कनेक्टिव्हिटी पूर्ण होणार आहे. मात्र, हा पूल नेमका कधी सर्वसामान्य नागरिकांसाठी खुला होतो, याकडे पुणेकरांचे लक्ष लागले आहे.