इराण युद्ध ट्रम्प यांच्या अंगलट, मदतीसाठी पसरले मित्र देशांकडे हात, तरी मदतीला येईना कुणी

खाडी देशांवर इराणचे भीषण हल्ले

मिळालेल्या अहवालानुसार, इराणने आधीच आपली क्षेपणास्त्रे सज्ज ठेवली होती. अमेरिकेने हल्ला करताच इराणने कतर, सौदी अरेबिया, संयुक्त अरब अमिराती (UAE) आणि बहरीन यांसारख्या देशांवर हल्ले चढवले आहेत. या हल्ल्यांमुळे संपूर्ण पश्चिम आशियातील स्थिरता धोक्यात आली. इराणची लष्करी ताकद संपल्याचा दावा अमेरिका करत असली, तरी जमिनीवर इराण अद्यापही जोरदार प्रत्युत्तर देण्यास सक्षम असल्याचं दिसून येत आहे.

advertisement

नाटो (NATO) आणि ट्रम्प यांच्यात जुंपली

या युद्धाच्या पार्श्वभूमीवर अमेरिकेचे राष्ट्राध्यक्ष डोनाल्ड ट्रम्प यांनी आपल्या 'नाटो' मित्रराष्ट्रांवर तीव्र शब्दात टीका केली आहे. ट्रम्प यांनी नाटोला 'एकतर्फी व्यवस्था' असं संबोधलं आहे. "अमेरिका आपल्या मित्रराष्ट्रांच्या सुरक्षेवर अब्जावधी डॉलर्स खर्च करते, परंतु जेव्हा मदतीची खरी गरज असते, तेव्हा हे देश मागे हटतात," अशा शब्दांत ट्रम्प यांनी आपला संताप व्यक्त केला.

ट्रम्प यांनी ब्रिटन आणि फ्रान्ससारख्या देशांना 'स्ट्रेट ऑफ होर्मुज' हा महत्त्वाचा सागरी मार्ग खुला ठेवण्यासाठी आपली युद्धनौका आणि सैनिक तैनात करण्याचं आवाहन केलं होतं. मात्र, बहुतांश नाटो देशांनी या युद्धात थेट सामील होण्यास नकार दिला आहे. त्याऐवजी, अमेरिका आणि इराणने राजनैतिक मार्गाने वाद सोडवावा, असा सल्ला या देशांनी दिला आहे.

मॅक्रॉन यांच्यावर वैयक्तिक टीका

नाटो देशांच्या नकारामुळे चिडलेल्या ट्रम्प यांनी फ्रान्सचे राष्ट्राध्यक्ष इमॅन्युएल मॅक्रॉन यांच्यावर वैयक्तिक हल्ला चढवला. "मॅक्रॉन लवकरच सत्तेतून बाहेर पडू शकतात," असे भाकीत वर्तवत ट्रम्प यांनी मित्रराष्ट्रांमधील दरी अधिक रुंदावली आहे. ट्रम्प यांचा दावा आहे की, इराणची हवाई दल आणि नौदल शक्ती पूर्णपणे नष्ट झाली आहे, मात्र इराणकडून होणारे सततचे क्षेपणास्त्र हल्ले अमेरिकेच्या या दाव्यावर प्रश्नचिन्ह उपस्थित करत आहेत.