Gajanan Maharaj: गण गण गणात बोते..! ऋषिपंचमी दिवशी यंदा गजानन महाराजांची पुण्यतिथी, धार्मिक महत्त्व

शेगावातील उत्सव -  पुण्यतिथी उत्सवाचा सोहळा भाद्रपद शुद्ध प्रतिपदेपासून (भाद्रपद महिन्याच्या पहिल्या दिवसापासून) सुरू होतो आणि भाद्रपद शुद्ध पंचमीपर्यंत विविध कार्यक्रम चालतात. या पाच दिवसांच्या काळात विविध धार्मिक कार्यक्रमांचे आयोजन केले जाते, ज्यात गणेशयाग, वरुणयाग, भजन, कीर्तन, प्रवचन आणि विविध दिंड्यांचा समावेश असतो. महाराष्ट्राच्या कानाकोपऱ्यातून आणि विशेषतः ग्रामीण भागातून हजारोंच्या संख्येने भजनी दिंड्या या उत्सवात सहभागी होतात. टाळ-मृदंगाच्या गजरात आणि हरिनामाच्या जयघोषात संपूर्ण वातावरण भक्तीमय होते.

नगर परिक्रमा - उत्सवाच्या दिवशी श्रींच्या रजत मुखवट्याची पालखी गज, अश्व, रथ आणि मेणा यांच्यासह संपूर्ण गावातून नगर परिक्रमेसाठी काढली जाते. या उत्सवासाठी शेगावात लाखो भाविक दर्शनासाठी येतात. गजानन महाराज हे "गण गण गणात बोते" या मंत्राचा अखंड जप करत असत आणि त्यांचे हे जीवन कार्य महाराष्ट्रासह देशभरात अनेक भक्तांसाठी प्रेरणादायी आहे. शेगाव संस्थानने स्वच्छता, शिस्त आणि उत्तम व्यवस्थापन यासाठी आदर्श घालून दिला आहे.