Ekadashi 2025: चातुर्मासासोबत घरातील अशुभताही होईल नष्ट; कार्तिकी एकादशीला केलेले हे उपाय फळ देतात

मुंबई : कार्तिक महिन्याच्या शुद्ध पक्षातील एकादशीला कार्तिकी एकादशी किंवा प्रबोधिनी एकादशी असं म्हणतात. हिंदू धर्मात, विशेषतः वैष्णव संप्रदायात आणि महाराष्ट्रातील वारकरी संप्रदायात या एकादशीला आषाढी एकादशीइतकेच महत्त्व आहे. कार्तिकी एकादशीचे सर्वात महत्त्वाचे धार्मिक कारण म्हणजे या दिवशी भगवान विष्णू चार महिन्यांच्या योग निद्रेतून (झोपेतून) जागे होतात, अशी धार्मिक मान्यता आहे. आषाढ शुद्ध एकादशीला भगवान विष्णू क्षीरसागरात शयन करतात, ज्याला 'देवशयनी एकादशी' म्हणतात. कार्तिकी एकादशीला भगवान विष्णू जागे होतात, म्हणून याला 'प्रबोधिनी एकादशी' किंवा 'देवोत्थानी एकादशी' असंही म्हणतात. या एकादशीसोबतच अशुभ चातुर्मासाचा काळ संपत असल्यानं आपल्या घरातून अशुभता नष्ट करण्यासाठी काही विशेष ठिकाणी दिवे लावावे.