जगात भारी, कोल्हापूर सुंदरी! 5 स्टार हॉटेलची रूम नाही, ही तर रिक्षा; सुविधा पाहिल्या का?

कोल्हापूर : झुंबर, लाइटिंग, फॅन्स, स्मोक डिटेक्टर, ऑक्सिजन टॅंक, कॅमेरे, एलसीडी स्क्रीन, फर्स्ट एड बॉक्स, इतकच नव्हे तर फ्रिजची देखील सोय.. या सगळ्या सुविधा कुठल्या आलिशन 5 स्टार हॉटेलमधल्या नाहीत. कोल्हापुरातील एका हौशी रिक्षा चालकाने आपल्या रिक्षात या सुविधा दिल्या आहेत. विशेष म्हणजे जशी ही रिक्षा आतून सर्व सोयीसुविधांनीयुक्त आहे, अगदी तशाच पद्धतीने बाहेरून देखील सजवण्यात आले आहे. गडहिंग्लज तालुक्यातील रमेश गंधवाले यांची ही कोल्हापूर सुंदरी रिक्षा असून त्यासाठी साडेचार लाख रुपयांचा खर्च करण्यात आलाये.

कोल्हापुरात महाराष्ट्र रिक्षा चालक संघटनेच्या वतीने रिक्षा सौंदर्य स्पर्धांचे आयोजन करण्यात आलं होतं. कोल्हापुरातील शिवसेना ठाकरे गटाचे नेते आणि महाराष्ट्र रिक्षा चालक संघटनेचे अध्यक्ष राजू जाधव यांच्या नेतृत्वाखाली आयोजित स्पर्धा नुकत्या झाल्या. या स्पर्धेत शेकडो रिक्षाचालकांनी सहभाग घेतला होता. त्यापैकी कोल्हापुरातील गडहिंग्लज तालुक्यातील रमेश गंधवाले यांच्या रिक्षाला ‘कोल्हापूर सुंदरी’ असा मानाचा पुरस्कार मिळाला.