inspiring story : हवालदाराची लेक झाली Indian Air Force मध्ये फ्लाइंग ऑफिसर, CDS परिक्षेतही देशात चौथी

मनिषा सिंह ही बिहारच्या आरा येथील नथमलपुर गावातील रहिवासी आहे. तिचे वडील अरविंद कुमार सिंह भारतीय सैन्यदलात हवालदार या पदावर कार्यरत होते. मनीषा सिंह हिची भारतीय हवाई दलातील फ्लाइंग ऑफिसर या पदावर निवड झाली आहे. तिने संपूर्ण भारतात एएफकॅटच्या परिक्षात 18 वी रँक मिळवली आहे. तसेच सैन्यदलातील सीडीएसमध्ये चौथी रँक मिळवली आहे.

तीन भाऊ बहिणींमध्ये मनिषा सिंह सर्वात मोठी आहे. येत्या 1 जुलै रोजी हैदराबाद येथे तिची ज्वाइनिंग होणार आहे. लोकल18 शी बोलताना तिने सांगितले की, तिचे वडील सैन्यदलात हवालदार पदावर कार्यरत होते. त्यांना पाहूनच ती मोठी झाली आहे. त्यांचा गणवेश, त्यांची ड्यूटी आणि सैन्यदलाचे वातावरण पाहून बालपणापासूनच मनात सैन्यदलात जायचे स्वप्न होते. त्यामुळे मॅट्रिकच्या शिक्षणानंतर आर्मी स्कूलमधून तिने बारावीचे शिक्षण घेतले. यानंतर दिल्ली विद्यापीठातून पदवीचे शिक्षण घेतले. यानंतर सैन्यदलात अधिकारी होण्याच्या इच्छेने दिल्लीत एसएसबीचे कोचिंग घेतले. लेखी परिक्षेची तयारी करण्यासाठी तिने तब्बल 10 ते 12 तास दररोज अभ्यास केला.