जिल्हा परिषद शाळेतील विद्यार्थी झाले मोडी लिपी वाचनात पारंगत; शिक्षकाच्या ‘या’ निर्याणाचे तुम्ही कराल कौतुक

सातारा : सातारा जिल्ह्यातील माण तालुक्यात विजयनगर येथील जिल्हा परिषद प्राथमिक शाळेत सातत्याने वेगवेगळे उपक्रम राबविले जातात. जिल्हा परिषद शाळेचे मुख्याध्यापक बालाजी जाधव आणि उपशिक्षक यांच्या कल्पनेतून आणि प्रयत्नातून इयत्ता दुसरी आणि चौथीचे 35 विद्यार्थी मोडी वाचन आणि लेखनात पारंगत झाले आहेत. साधारण 12 व्या शतकातील ही लिपी खऱ्या अर्थाने छत्रपती शिवाजी महाराजांच्या पत्र व्यवहारामुळे 16 व्या शतकापासून सर्वांना अधिक परिचित झाली. खरे तर 1960 पूर्वी ही मोडी लिपी महाराष्ट्रात शालेय शिक्षणात शिकवली जायची. मात्र छपाईच्या समस्यामुळे ती बंद करण्यात आली होती.

विजयनगर येथील परिषदेच्या प्राथमिक शाळेतील शिक्षक बालाजी जाधव यांनी विद्यार्थ्यांना भविष्यात इतिहासातील संशोधक होता यावे. त्याचे वाचन करता यावे या हेतूने हे लिपी शिकवण्याचा निर्णय घेतला आहे. मुलांच्या उज्वल भविष्यासाठीचे मार्ग सुखकारक व्हावे आणि मुलांना मोडी लिपी शिकवता यावे यासाठी बालाजी जाधव यांनी तंत्रज्ञानाच्या साह्याने ही लिपी पहिली शिकून घेतली आणि त्यानंतर शाळेतील विद्यार्थ्यांना शिकवली आहे.