शेतकऱ्यांसाठी फायदेशीर ‘अझोला’, जनावरांचं दूध उत्पादन वाढेल 15 दिवसांत, पीकही येईल जोमात!

शाहजहापूर : ‘अझोला’ हे नाव वाचायला, ऐकायला जरा विचित्र वाटत असलं, तरी पाण्यावर उगवणारी ही वनस्पती दुधाळ जनावरांसाठी उत्तम खाद्यपूरक आहे. ‘अझोला’मध्ये कॅल्शियम, फॉस्फरस, पोटॅशियम, लोह, तांबे आणि मग्नेशियम हे उपयुक्त खनिज पदार्थ परिपूर्ण असतात. अझोला चाऱ्यात मिसळून जनावरांना देता येते. विशेष म्हणजे ही वनस्पती उगवायला अत्यंत कमी खर्च येतो. साधारणपणे तांदळाच्या शेतात किंवा उथळ पाण्याच्या जागी अझोला आपसूक उगवते.

उत्तर प्रदेशमधील कृषी विज्ञान केंद्र शाहजहापूरचे शास्त्रज्ञ डॉ. एनपी गुप्ता यांनी याबाबत माहिती देताना सांगितलं की, अझोला वनस्पती तलाव, झरे आणि खड्ड्यांमध्ये तुंबलेल्या पाण्यात उगवते. प्राण्यांना हिरवा चारा म्हणून ही वनस्पती देता येते. दररोज ही वनस्पती आपल्या जनावरांना दिल्यास 10 ते 15 दिवसांत त्यांच्या दुधात वाढ होते, अशी माहिती डॉक्टरांनी दिली. विशेष म्हणजे अझोला माश्यांना खायला दिल्यास त्यांचं वजन लवकर वाढतं, असंही डॉक्टर म्हणाले. शिवाय कोंबड्यांना ही वनस्पती दिल्यास त्यांच्या अंड्यांची गुणवत्ता सुधारते.