सावधान! WhatsAppमधील 'या' लिंक्स चुकूनही करू नका क्लिक; अन्यथा बँक खातं होईल रिकामं, कशी घ्याल काळजी?

या संदर्भात माहिती देताना जिल्हा पोलीस प्रशासन सांगतं की, मागील 7 महिन्यांत तिघांचा सायबर फसवणूक झाली आहे. त्यामध्ये 1 लाख 90 हजारांची फसवणूक करण्यात आली होती. पोलीस अधिक्षक श्रीकृष्ण कोकाटे यांच्या मार्गदर्शनाखाली पोलिसांनी तत्काळ कारवाई करत 94 हजारांची रक्कम परत मिळवली आहे.

पहिल्यांदा तुमच्या व्हाॅट्सअपवर अनोळखी नंबरवरून काही लिंक्स येतात. त्यामध्ये एपीके फाइल्स स्वरुपात ॲप्स दिले जातात. या लिंक्स आणि ॲप्स दिसताना आपल्याला सुरक्षित वाटतात. शादी का आमंत्रण किंवा वेडिंग इन्व्हिटेशन कार्ड, एसबीआय रिवाॅर्ड्स, पीएम किसान लिस्ट... अशा नावांनी या फाइल्स येतात. तुम्ही त्यावर क्लिक केलात किंवा डाऊनलोड केलात, तर तुमच्या व्हाॅट्सअप हॅक होतो. त्यानंतर तुमच्या गुगल पे, फोन पे आणि बँकिंग ॲप्सवर ताबा मिळवला जातो आणि तुमचं बँक खातं पूर्णपणे रिकामं होतं. इतकंच नाहीतर तुमच्या मोबाईलमधील काॅन्टॅक्ट लिस्टवरून इतरांना त्या लिंक्स पाठवून त्यांचीही फसवणूक केली जाते.

तत्काळ 1930 किंवा 1945 या नंबरवर संपर्क साधा. तसेच cybercrime.gov.in या वेबसाइटवर जाऊन तक्रार नोंदवा. शक्य नसेल तर जवळच्या पोलीस ठाण्याशी संपर्क साधा.