Crime News : पत्नीच्या खर्चाला त्रासून रचला मोठा कट; प्रेम-धोका-हत्येची कथा ऐकून पोलीसही चक्रावले

पोलिसांच्या माहितीनुसार, हेमंत शर्माने पत्नीच्या खुनाचा कट रचला व त्याला रस्त्यावरच्या अपघाताचं रूप दिलं. त्याच्या एका चुकीमुळे घटनेचा पर्दाफाश झाला. त्याने पत्नीचा खून करायला मित्रांना अडीच लाख रुपये दिले होते. घटनेच्या दिवशी कटाचा भाग म्हणून हेमंत पत्नी दुर्गावती व तिचा भाऊ संदेशला मंदिरात घेऊन गेला. परत येताना हेमंतच्या एका मित्राने इकोस्पोर्ट कारने जाणूनबुजून दुर्गावती व तिच्या भावाच्या बाइकला धडक दिली. यात दुर्गावती गंभीर जखमी झाली, रुग्णालयात उपचारादरम्यान तिचा मृत्यू झाला. या घटनेत संदेश जखमी झाला आहे.

पोलीस तपासात उघड झालेल्या माहितीनुसार, मृत दुर्गावती ही हेमंत शर्माची दुसरी पत्नी आहे, पहिली पत्नी मुरैना इथल्या वडिलोपार्जित घरात राहते. हेमंत आणि दुर्गावती यांचे 2017पासून प्रेमसंबंध होते, तेव्हा दोघेही परीक्षेची तयारी करत होते. 2021मध्ये दुर्गावतीच्या वडिलांनी तिचं दुसऱ्याशी लग्न केलं. 2022मध्ये हेमंतचंही दुसरीशी लग्न झालं. त्यानंतर हेमंत आणि दुर्गावती दोघेही आपापले आयुष्य जगू लागले.

हेमंतच्या लग्नानंतर काही दिवसांनी दुर्गावतीने अचानक पतीला घटस्फोट दिला आणि ती परत आली. नंतर पुन्हा दुर्गावती आणि हेमंत एकमेकांच्या संपर्कात आले. प्रेम पुन्हा फुललं आणि 2023मध्ये त्यांनी कोर्टात लग्न केलं. लग्नानंतर दोघेही पडाव परिसरातल्या साकेतनगरमध्ये राहू लागले. त्यांच्या आयुष्यात सगळं नीट चाललं असताना दुर्गावतीच्या जास्त खर्चाच्या सवयीमुळे नात्यात कडवटपणा आला.