बळीराजा सावधान! 11 शेतकऱ्यांची तब्बल 72 लाखांची फसवणूक, व्यापारी म्हणून आले अन्..

द्राक्षमाल बघण्यासाठी व्यापारी अजिज आला. त्याने ‘तुमची द्राक्षे निर्यातक्षम आहेत, बाहेरच्या देशात पाठवावी लागतील, याचा मोबदलाही चांगला मिळेल’ असे सांगितले. यानुसार प्रतिबॉक्स 4 हजार 107 रुपये दर ठरला. एकूण 16 हजार 428 किलो द्राक्षमाल त्यांनी उचलला. त्या द्राक्षमालाची एकूण किंमत 11 लाख 50 हजार रुपये दोन दिवसांनी तुम्हाला देतो, असे सांगून कुमार कोरे व अन्य शेतकर्‍यांची द्राक्षे त्यांनी नेली.

कोरे यांनी ठरल्यानुसार दोन दिवसानंतर संबंधित व्यापार्‍यांशी दूरध्वनीवरून संपर्क करण्याचा प्रयत्न केला. तेव्हा त्यांनी पैसे देण्यास टाळाटाळ केली. तसेच ‘पैसे देत नाही, तुला काय करायचे ते कर’ असे सांगून कोरे यांचा मोबाईल क्रमांक ब्लॅक लिस्टमध्ये टाकला. यामुळे कोरे यांना आपली 11 लाख 50 हजार रुपयांची फसवणूक झाल्याची खात्री झाली.

याबाबतची फिर्याद कुमार सुखदेव कोरे (रा. जिरग्याळ) यांनी जत पोलिसांना दिली आहे. याप्रकरणी अजिज युनूस हाशमी, कैफ अजिज हाशमी, शफिक (पूर्ण नाव माहीत नाही, सर्व राहणार पवननगर बिबवेवाडी, पुणे) यांच्यावर फसवणुकीचा गुन्हा दाखल झाला आहे. याप्रकरणी अधिक तपास सुरू आहे.

कोरे यांच्यासोबतच परिसरातील इतर शेतकऱ्यांची देखील फसवणूक झाली आहे. राजाराम बाळू कोरे (रा. जिरग्याळ, ता. जत) यांची 5 लाख 22 हजार रुपयांची, अंबाजी दशरथ कोडलकर (रा. खिलारवाडी) यांची 3 लाख 85 हजार रुपयांची, खंडू श्रीमंत कोडलकर (रा. खिलारवाडी) यांची 8 लाख 5 हजार रुपयांची, बसवराज बालचंद्र म्हेत्रे (रा. एकुंडी) यांची 1 लाख 59 हजार रुपयांची, संजय बाबू गुड्डोडगी (रा. एकुंडी) यांची 1 लाख 79 हजार रुपयांची फसवणूक झाली.