वर्षा उसगांवकरांच्या आयुष्यावर बनणार बायोपिक? मुख्य भूमिकेत कोण? अभिनेत्रीने थेट नावच सांगितलं

वर्षा उसगांवकरांच्या बायोपिकमध्ये मुख्य भूमिकेत कोणती अभिनेत्री असावी यावर उत्तर देताना त्या म्हणाल्या, “हा खूपच कठीण प्रश्न आहे. ती अभिनेत्री माझ्यासारखी दिसली पाहिजे. फक्त घारे डोळे असून चालणार नाही. मला आता तरी तसं कोणी दिसत नाहीये. एक काळ असा होता जेव्हा लोक म्हणायचे की अर्चना जोगळेकर आणि माझ्यात खूप साधर्म्य आहे. मला पुरस्कार मिळाला की लोक तिचे अभिनंदन करायचे. तिला मिळाला तर माझं अभिनंदन करायचे. सध्याच्या घडीला तशी कोणती तरुण अभिनेत्री असती, कोणी तरुण अर्चना जोगळेकर असती, तर मी म्हणाले असते तिला घ्या. पण तिच्यासारखी दिसणारी मला तरी कोणी लक्षात येत नाही आहे. पटकन कोणी डोळ्यासमोर येत नाही.”

याव्यतिरिक्त त्यांनी या मुलाखतीत, त्यांच्या 'बिगबॉस'मधील प्रवास आणि इतर स्पर्धकांबद्दलही त्यांचं मत मांडलं. त्यांनी हिंदीतील बड्या स्टार्स, जसे की, मिथुन चक्रवर्ती, अनिल कपूर, ऋषी कपूर यांच्यासोबत काम करण्याचा अनुभवही सांगितला. यावेळी त्यांनी सांगितलं, “मी ऋषी कपूर यांच्यासोबत केवळ 'हनिमून' या एकाच चित्रपटात काम केले आहे. शूटिंगदरम्यान ज्यावेळी ऋषी कपूर सेटवर यायचे तेव्हा जास्त बोलायचे नाहीत, त्यामुळे ते खडूस आहेत असे मला वाटत होतं. पण त्यांच्या 'खुल्लम खुल्ला' या आत्मचरित्रात त्यांनी माझा उल्लेख केला आहे. तेव्हा माझ्या लक्षात आलं की ते माणूस म्हणून किती मोठे आहेत.”