Bigg Boss Marathi 6: "अभी मजा आएगा ना भिडू...", 'बिग बॉस'च्या घरात 'बिग बॉस क्वीन'ची एन्ट्री होणार?

काही तासांपूर्वीच 'राजश्री मराठी'च्या इन्स्टा हँडलवर या बातमीची माहिती देण्यात आली आहे. बिग बॉस मराठीच्या सहाव्या पर्वात राखी सावंत येणार असल्याचं कळताच चाहत्यांकडून बिग बॉसच्या घरात चांगलाच दंगा होणार असल्याचं बोललं जात आहे. कलर्स मराठीवरील बिग बॉस मराठी सहाच्या घरातील तापमान आता चांगलंच वाढणार आहे. याचं कारण, बिग बॉस क्विन राखी सावंत 15 दिवसांसाठी बिग बॉस मराठीच्या घरात येणार आहे, अशी माहिती राजश्री मराठीला जवळच्या सुत्रांनी दिलीये. राखी सावंत बिग बॉसच्या घरातील सर्वच स्पर्धक चांगलेच खडखडून जागे होतील, हे मात्र नक्की.

प्रत्येक स्पर्धक आपल्या वेगवेगळी रणनिती आखून खेळ खेळणार, हे मात्र नक्की आहे. बिग बॉस हिंदीसह बिग बॉस मराठीतही गेल्या अनेक सीझन्सपासून राखी सावंतला चाहते पाहत आहेत. आपल्या मिश्किल स्वभावासाठी ओळखली जाणारी राखी प्रेक्षकांसह स्पर्धकांचेही खळखळून मनोरंजन करते. तिच्या वक्तव्यांची कायमच सोशल मीडियावर जोरदार चर्चा होते. बिग बॉस मराठीच्या चौथ्या सीझनमध्ये राखी सावंत वाईल्ड कार्ड स्पर्धक म्हणून आली होती. शिवाय, बिग बॉस मराठीच्या पाचव्या सीझनमध्ये एक ते दोन दिवसांसाठी राखी सावंत आली होती. आता देखील राखी 15 दिवसांसाठी येणार असल्याचे बोलले जात आहे. सध्या सोशल मीडियावर या बातमीची जोरदार चर्चा होत आहे.

सोशल मीडियावर चाहत्यांकडून राखीसोबत अनेक स्पर्धकांचे भांडण व्हायला हवे, अशी कमेंट युजर्सने केली आहे. चाहत्यांनी कमेंटमध्ये स्पर्धकांची नावं सुद्धा लिहिलेली आहेत. नेमकी राखी केव्हा बिग बॉसच्या घरात येणार ? याची माहिती मिळालेली नाही.