Gautami Patil : संध्या यांच्या 50 वर्ष जुन्या लावणीवर थिरकली गौतमी पाटील, 'ज्वानीच्या आगीची मशाल' आता नव्या ढंगात

Gautami Patil : 'पिंजरा' हा 1972 मध्ये प्रदर्शित झालेला चित्रपट चांगलाच गाजला. आजही या चित्रपटातील गाणी अनेकांच्या ओठांवर आहेत. 'पिंजरा'प्रेमींसाठी एक आनंदाची बातमी आहे. या चित्रपटातील 'दिसला ग बाई दिसला' या संध्याच्या गाण्यावर आता गौतमी पाटील थिरकताना दिसणार आहे. 'प्रेमाची गोष्ट 2’ दिवाळीच्या शुभमुहूर्तावर प्रेक्षकांच्या भेटीला येत असतानाच, या चित्रपटातील तिसरं गाणं 'दिसला गं बाई दिसला 2.o’ सध्या प्रचंड गाजतंय. आधीच ट्रेंडिंगमध्ये असलेल्या पहिल्या दोन गाण्यांनंतर हे गाणंही रसिकांच्या प्लेलिस्टमध्ये झळकू लागलं आहे. ‘दिसला गं बाई दिसला 2.o’ या नव्या आवृत्तीने जुन्या आठवणींना नवा झगमगाट दिला आहे. गौतमी पाटीलच्या अफाट एनर्जीने आणि ललित प्रभाकरच्या जबरदस्त साथीनं या गाण्याला एक वेगळंच रूप मिळालं आहे. राम कदम आणि अविनाश-विश्वजीत यांच्या जोशपूर्ण संगीतासह जगदीश खेबुडकर आणि विश्वजीत जोशी यांचे बोल लाभलेलं हे गाणं अधिकच श्रवणीय बनलं आहे. राधा खुडे, आदर्श शिंदे आणि विश्वजीत जोशी यांच्या आवाजात हे गाणं आणखीनच रंगतदार झालं आहे. पॉल मार्शलच्या चैतन्यपूर्ण नृत्यदिग्दर्शनाने यात अधिकच रंगत आली आहे.