आई-वडिलांच्या हट्टापायी लग्न, माझं तिच्यावर प्रेम नाही... लग्नाच्या २६ वर्षांनंतर निरहुआचा खळबळजनक खुलासा!

"माझं पत्नीवर कधीच प्रेम नव्हतं, मी फक्त कर्तव्यापोटी हे नातं निभावतोय," असं निरहुआने एका मुलाखतीदरम्यान सांगितलं. डिजिटल कॉमेंट्रीला दिलेल्या मुलाखतीत निरहुआने आपल्या लग्नामागचं सत्य सांगितलं. तो म्हणाला, "माझं लग्न माझ्या आई-वडिलांनी जबरदस्तीने लावून दिलं होतं. मी त्यांना खूप विनवण्या केल्या, मला करियर करायचं आहे, त्यात यश मिळूदे मग त्यानंतर लग्न करेन पण त्यांनी माझं ऐकलं नाही. मला आयुष्यात असा जोडीदार हवा होता ज्याच्यावर मी प्रेम करू शकेन, पण दुर्दैवाने माझ्यासोबत तसं कधीच झालं नाही."

निरहुआ इथेच थांबला नाही, तर त्याने पत्नीलाही हे कटू सत्य माहिती असल्याचं सांगितलं. त्याची पत्नी मंशा यादव हिलाही सांगितलं आहे. "मी माझ्या पत्नीला आणि मुलांनाही स्पष्टपणे सांगितलं आहे की, माझं तिच्यावर कधीच प्रेम नव्हतं. आई-वडिलांनी लग्न लावून दिलं म्हणून मी माझा संसार आणि कर्तव्य पूर्ण प्रामाणिकपणे पार पाडत आहे. पण मनात एक खंत आणि अपराधीपणाची भावना कायम असते," हे बोलताना निरहुआ भावुक झाला होता.

स्वतःच्या आयुष्यात प्रेमाची कमतरता राहिली असली, तरी निरहुआने आपल्या मुलांच्या बाबतीत एक महत्त्वाचा निर्णय घेतला आहे. तो म्हणाला, "माझ्यासोबत जे घडलं ते मी माझ्या मुलांच्या बाबतीत कधीच होऊ देणार नाही. मी माझ्या मुलांना त्यांचा जीवनसाथी निवडण्याचं पूर्ण स्वातंत्र्य देईन. मी त्यांच्यावर कधीच माझं मत लादणार नाही."

निरहुआ आणि मंशा यादव यांच्या लग्नाला २६ वर्ष झाली मात्र इतक्या वर्षांनंतर आता पतीचा हा खुलासा चर्चेचा विषय ठरला आहे. २००० साली त्यांचं लग्न झालं होतं आणि त्यांना दोन मुलं आणि एक मुलगी आहे. निरहुआचं नाव अनेकदा आम्रपाली दुबेसोबत जोडलं गेलं, पण मंशा यादव कधीही मीडियासमोर आल्या नाहीत किंवा त्यांनी यावर कोणतीही प्रतिक्रिया दिली नाही. त्यांनी नेहमी लाईमलाइट आणि प्रसिद्धी झोतापासून चर्चेपासून दूर राहाणं पसंत केलं.