'लवकरच भेटूया...' मालिका सुरू होण्याआधीच तेजश्री प्रधानने सांगितलं मालिकेतील नाव, कधीपासून पाहता येणार?

तेजश्री प्रधान आता 'झी मराठी' वाहिनीवरील आगामी 'वीण दोघांतली ही तुटेना' या मालिकेत मुख्य भूमिकेत झळकणार आहे. यात तिच्यासोबत लोकप्रिय अभिनेता सुबोध भावे देखील महत्त्वाच्या भूमिकेत दिसणार आहे. मालिकेचं प्रमोशन सध्या जोरात सुरू असून, याच निमित्ताने तेजश्रीने तिच्या इन्स्टाग्राम अकाऊंटवरून काही खास फोटो आणि एक भावनिक कॅप्शन शेअर केलं आहे.

तेजश्रीने मालिकेच्या चित्रीकरणादरम्यानचे काही फोटो शेअर केले आहेत, ज्यात ती एका बस स्टॉपवर बसलेली दिसतेय. या फोटोंसोबत तिने एक हृदयस्पर्शी संदेश लिहिला आहे: "ज्या जागांनी तुमच्या मनात माझ्यासाठी जागा निर्माण केली, त्या जागी जाऊन पुन्हा एकदा तुम्ही दिलेल्या प्रेमाच्या आठवणींना जाग आली... सज्ज झालेय पुन्हा एकदा तुमच्या मनात तिची 'जागा' निर्माण करायला, एक नवीन पात्र, नव्या उमेदीने जगायला लवकरच भेटूया 'स्वानंदी सरपोतदारला'... आशीर्वाद असू द्या." तिच्या या पोस्टने चाहत्यांमध्ये प्रचंड उत्सुकता निर्माण केली आहे, कारण तिने तिच्या नव्या भूमिकेचं नावही यात उघड केलं आहे.

'वीण दोघांतली ही तुटेना' ही मालिका लवकरच प्रेक्षकांच्या भेटीला येणार असली तरी, अद्याप प्रदर्शनाची नेमकी तारीख जाहीर झालेली नाही. सुबोध आणि तेजश्री यांच्याव्यतिरिक्त मालिकेत आणखी कोणते कलाकार असणार, हे पाहणंही रंजक ठरेल.

'वीण दोघांतली ही तुटेना' या मालिकेद्वारे तेजश्री 'झी मराठी'वर पुन्हा एकदा परतणार आहे. याआधी तिने याच वाहिनीवरील 'अगं बाई सासुबाई' आणि 'होणार सून मी ह्या घरची' या प्रचंड गाजलेल्या मालिकांमध्ये मुख्य भूमिका साकारल्या होत्या, ज्यांना प्रेक्षकांचा भरभरून प्रतिसाद मिळाला होता.