Explainer: लंडनच्या स्टेशनवरील साइनबोर्डाचा वाद झाला आंतरराष्ट्रीय; मस्कपासून ममता बॅनर्जींची उडी, प्रकरण नेमके काय?

लंडनच्या व्हाईटचॅपल अंडरग्राउंड स्टेशनवरील साइनबोर्ड इंग्रजीसोबतच बंगाली भाषेत लावण्यात आला. हा निर्णय त्या भागातील मोठ्या ब्रिटिश बांगलादेशी समुदायाच्या योगदानाला मान्यता देण्यासाठी घेण्यात आला होता. मात्र रिफॉर्म यूके पार्टीचे खासदार रूपर्ट लोव यांनी यावर आक्षेप घेतला आणि ट्वीट करत म्हटले की, हे लंडन आहे आणि स्टेशनचे नाव केवळ इंग्रजीमध्ये असायला हवे. यावर टेस्ला आणि एक्स (Twitter)चे प्रमुख एलन मस्क यांनी त्यांच्या या मताला पाठिंबा देत Yes असे एक शब्दाचे उत्तर दिले. मस्कच्या या प्रतिसादामुळे हा विषय आंतरराष्ट्रीय स्तरावर अचानक चर्चेत आला आणि सोशल मीडियावर वाद सुरू झाला.

एलन मस्क यांनी रूपर्ट लोव यांच्या मताला पाठिंबा दिला. ब्रिटीश राजकारणातील मुद्द्यांवर प्रतिक्रिया देण्याची मस्क यांची ही पहिली वेळ नाही. आता देखील त्यांनी या विषयात मत व्यक्त करून उडी मारली आहे. मस्क यांची ही प्रतिक्रिया पुन्हा चर्चेचा विषय ठरली. मस्क यांच्या आधी भारतातील पश्चिम बंगालच्या मुख्यमंत्री ममता बॅनर्जी यांनी यावर आनंद व्यक्त करत ट्विटरवर एक पोस्ट केली होती. त्यांच्या ट्विटमुळे हा मुद्दा भारत आणि बांगलादेशातही चर्चेत आला.

ही घटना लंडनमधील व्हाईटचॅपल अंडरग्राउंड स्टेशनवर घडली. हे ठिकाण मोठ्या प्रमाणावर ब्रिटिश बांगलादेशी नागरिकांनी वसवले आहे आणि या भागाला 'लिटल बांगलादेश' असेही काही वेळा संबोधले जाते.विशेष म्हणजे याआधीही लंडनमधील चायनाटाउनमध्ये चिनी भाषेत, ब्रिक लेनमध्ये बंगाली भाषेत, आणि साउथऑलमध्ये पंजाबी (गुरुमुखी) लिपीत फलक दिसतात, त्यामुळे व्हाईटचॅपलसाठी हा निर्णय नवा नव्हता.

बंगाली भाषेतील साइनबोर्ड 2021 मध्ये बांगलादेशच्या 50 व्या स्वातंत्र्यदिनाच्या निमित्ताने लावण्यात आला होता. त्यावेळी अब्दाल उल्लाह यांच्या नेतृत्वाखाली अनेक उपक्रम राबवले गेले होते. ज्यात लंडन आयला लाल-हिरव्या रंगाने प्रकाशित करणे, बांगलादेशी समुदायाच्या योगदानावर आधारित एक म्युरल तयार करणे आणि व्हाईटचॅपल अंडरग्राउंड स्टेशनवर साइनबोर्ड लावण्याचा प्रस्ताव ठेवणे. 2021 मध्ये अब्दाल उल्लाह आणि त्यांच्या सहकाऱ्यांनी हा प्रस्ताव Transport for London कडे पाठवला.TfLला हा प्रस्ताव योग्य वाटला आणि त्यांनी मंजुरी दिली. काही दिवसांतच बंगाली भाषेतील नवीन साइनबोर्ड व्हाईटचॅपल स्टेशनवर लावण्यात आला.

-ब्रिटनमध्ये राहणाऱ्या बांगलादेशी समुदायाने आर्थिक, सामाजिक आणि सांस्कृतिक पातळीवर मोठे योगदान दिले आहे.

रूपर्ट लोव आणि त्यांचा पक्ष "Reform UK" स्थलांतरितांविरोधी धोरणे मांडत असतो. त्यांच्या मते,ब्रिटनमध्ये सार्वजनिक ठिकाणी इंग्रजीशिवाय इतर भाषांना स्थान देणे चुकीचे आहे. एलन मस्क ब्रिटनमधील अनेक मुद्द्यांवर सोशल मीडियावर मतप्रदर्शन करतात आणि त्यांच्या Yes या एका शब्दाने हा वाद लंडनच्या बाहेर आला.

काही जणांना हा निर्णय संस्कृती जपण्याचा प्रयत्न वाटतो, तर काही जणांना तो स्थानिक समाजात विभागणी करणारा वाटतो.एलन मस्कसारख्या प्रभावशाली व्यक्तीने या विषयावर प्रतिक्रिया दिल्यामुळे हा मुद्दा आंतरराष्ट्रीय चर्चेत आला आहे. ब्रिक लेन, साउथऑल, चायनाटाउन यांसारख्या भागांत आधीच स्थानिक भाषेतील फलक आहेत, त्यामुळे हा विरोध राजकीय हेतूने प्रेरित असल्याचे काही लोकांचे मत आहे.