Kalyan- Shilphata Metro: डोंबिवली ते नवी मुंबई आता मेट्रोने जा! 'मेट्रो 12A' मार्गाची घोषणा, इतके आहे स्थानकं

कल्याण- डोंबिवलीकरांचा प्रवास अधिक वेगवान करण्यासाठी या क्षेत्रामध्ये अनेक प्रकल्प सुरू आहेत. मेट्रो, रेल्वे, रस्ते, उड्डाणपूल, उन्नत मार्ग, रेल्वे पूल आणि रस्ता रुंदीकरण असे प्रकल्प सुरू असून अनेकांचे काम पूर्ण झाले आहेत. याशिवाय, एमएमआरडीएने या प्रकल्पाचं काम पूर्ण करण्यासाठी 4897 कोटी रुपयांचा निधी मंजूर केला असून खासदार डॉ. श्रीकांत शिंदे यांनी या प्रकल्पाच्या सद्यस्थितीची पाहणी केली. यावेळी खासदार श्रीकांत शिंदे यांनी पलावा उड्डाणपूल, मेट्रो 12, तिसरा पत्री पूल, वालधुनी नदी लगत विठ्ठल वाडी स्टेशन ते कल्याण नव्या अहिल्यानगर महामार्गापर्यंतचा उन्नत मार्ग आणि कल्याण रिंग रोड या प्रकल्पाची पाहणी केली.

प्रकल्पाचे काम जलद गतीने करण्याचे आणि प्रकल्पासाठी जमीन उपलब्ध करून देण्यासाठी आवश्यक असलेले अतिक्रमण हटवण्याचे निर्देश सुद्धा त्यांनी दिले. यावेळी त्यांनी तळोजा मेट्रो 12 च्या विस्ताराची घोषणा केली. या मार्गाच्या विस्तारामुळे कल्याण शीळ मार्गावरील आणखी काही गावांनाही या मेट्रोचा फायदाही होणार आहे. मेट्रो 12 चे मार्ग दोन भागातून जात आहे. पहिल्या मार्गासाठी स्थानके निश्चित झाली असून दुसऱ्या मार्गाचा फायदा डोंबिवली, मानपाडा, काटई नाका, ग्रोथ सेंटर, देसाई नाका, पडले गाव, कल्याण फाटा, गोठेघर, दहिसर मोरी, दहिसरगाव, किरवली गाव, रोहिंजन आणि खुटारी गाव भागातील प्रवाशांना होईल. मेट्रो 12 आणि मेट्रो 12 ए खुटारी येथे एकत्रित येतील. ही मेट्रो लाईन ग्रामीण भागातून जाणारी पहिली मेट्रो असेल. भविष्यात ती मेट्रो 14 सोबतही जोडली जाणार असल्याचे बोलले जात आहे. भविष्यात मेट्रो जोडल्यास नवी मुंबई, कांजूरमार्ग ते मुंबई थेट प्रवासासाठी त्याचा फायदा होईल.

विस्तारित मार्ग मेट्रो 14 सोबत कटाई नाका ते कल्याण फाटा दरम्यान रेल्वे ट्रॅक आणि रेल्वे स्टेशन एकत्र करण्याचा प्रस्ताव आहे. हा मेट्रो मार्ग निळजे डेपो, मेट्रो 14 आणि नॅशनल हायस्पीड रेल्वेच्या ठाणे बुलेट ट्रेन स्टेशनला जोडला जाणार आहे. या सुधारित मार्गाची एकूण लांबी 18.4 किलोमीटर इतकी आहे. सध्या, अंदाजे 10.5 किलोमीटरच्या मार्गावरीव बांधकाम सुरू आहे.