Cancer : तुमच्या किचनमधील 3 भांडी ज्यामुळे होऊ शकतो कॅन्सर

आपल्यासाठी चांगलं अन्न खाणे जितके महत्त्वाचं आहे तितकंच आपण कोणत्या भांड्यात स्वयंपाक करत आहोत हे देखील महत्त्वाचं आहे. स्वयंपाकघरात वापरल्या जाणाऱ्या काही गोष्टी कर्करोगाचा धोका वाढवू शकतात. जेव्हा काही भांडी जास्त काळ गरम केली जातात किंवा वापरली जातात तेव्हा ते हानिकारक रसायने सोडू शकतात, जी हळूहळू आपल्या शरीरात जमा होऊ शकतात आणि कर्करोगासारखे गंभीर आजार होऊ शकतात. जर तुम्हीही स्वयंपाकासाठी अशी भांडी वापरत असाल तर ती ताबडतोब स्वयंपाकघरातून बाहेर फेकून द्या आणि निरोगी पर्यायांचा अवलंब करा.

कॅन्सर तज्ज्ञ डॉ. तरंग कृष्णा यांनी याबाबत इन्स्टाग्रामवर व्हिडीओ पोस्ट केला आहे. त्यांनी किचनमधील 3 भांड्यांबाबत सांगितलं आहे. ज्यामुळे कॅन्सर होऊ शकतो. ती भांडी कोणती ते पाहुयात.

अॅल्युमिनियमची भांडी :   अॅल्युमिनियम हा एक धातू आहे जो भांड्यांमध्ये मोठ्या प्रमाणात वापरला जातो. कुकर, पॅन, प्लेट, चमचा व्यतिरिक्त अॅल्युमिनियम फॉइलचा वापरदेखील केला जातो. डॉ. कृष्णा म्हणाले की स्वयंपाकघरातून अॅल्युमिनियमची भांडी फेकून द्या. कारण अनेक संशोधनात असं आढळून आलं आहे की जेव्हा तुम्ही अॅल्युमिनियमच्या भांड्यांमध्ये अन्न शिजवता तेव्हा तुमच्या अन्नात 1-2 मिलीग्राम अॅल्युमिनियम मिसळू शकतं. यामुळे शरीरात हळूहळू विषारीपणा वाढतो आणि शरीराच्या पेशींमध्ये बदल होऊन कर्करोग होऊ शकतो.

टेफ्लॉन-लेपित नॉन-स्टिक भांडी : जर तुम्ही टेफ्लॉन-लेपित नॉन-स्टिक भांडी स्टील स्क्रबरने घासली तर तुम्ही अन्न विषात तळत आहात. अशी भांडी अॅल्युमिनियम किंवा स्टील स्क्रबरने स्वच्छ केली तर त्यांचा लेप निघू लागतो, ज्यामुळे धोकादायक रसायने बाहेर येऊ लागतात. जास्त उष्णतेवर ही भांडी हानिकारक धूर सोडू शकतात, ज्यामुळे टेफ्लॉन फ्लू किंवा पॉलिमर फ्यूम फिव्हर नावाचा आजार होऊ शकतो. त्याची लक्षणं ताप, डोकेदुखी, थकवा इत्यादी आहेत.

प्लॅस्टिकची भांडी : डॉक्टरांनी स्पष्टपणे स्वयंपाकघरातील प्लॅस्टिकची भांडी फेकून देण्यास सांगितलं आहे. विशेषतः काळी प्लॅस्टिक सर्वात धोकादायक आहे. त्यात ज्वालारोधक नावाची रसायने असतात, जी प्लॅस्टिकला आगीपासून वाचवण्यासाठी जोडली जातात. प्लॅस्टिक गरम केल्यावर ही रसायने अन्नात विरघळू शकतात आणि शरीराच्या हार्मोन्स, प्रजनन प्रणाली आणि न्यूरोलॉजिकल सिस्टमवर परिणाम करू शकतात. यामुळे कर्करोगाचा धोका देखील वाढतो.