Winter Skin Care: थंडी आणि प्रदूषणामुळे कोरडी पडतेय त्वचा, ‘या’ टिप्स वापरून घ्या त्वचेची काळजी

मुंबई : गेल्या काही दिवसांपासून कडाक्याच्या थंडीचं पुनरागमन झालंय. अशातच महाराष्ट्रातल्या विविध भागामध्ये अवकाळी पावसाने हजेरी लावलीये. मुंबईसह इतर मोठ्या शहरांमुळे हवेची गुणवत्ता कमालीची खालावली आहे. यामुळे थंडीसोबतच वायू प्रदूषणाचाही त्रास आपल्याला सहन करावा लागतो. या सगळ्या गोष्टी आपल्या आरोग्यासाठी घातक आहेतच. या सगळ्याचा एकत्रित आणि विपरीत परिणामही त्वचेवर झाल्यामुळे अनेकांना त्वचा विकारांना सामोरं जावं लागतंय. असं नाहीये त्वचा विकारांचा त्रास हा फक्त महिलांच होतोय. पुरूषांना देखील या त्रासाला सामोरं जावं लागतंय. डॉक्टरांच्या मते, थंड हवा आणि प्रदूषणामुळे त्वचेला दुहेरी नुकसान पोहचतं. थंडी आणि कोरड्या हवेमुळे त्वचा कोरडी आणि निर्जीव होते. दुसरीकडे, हवेतील प्रदूषकांमुळे त्वचेचं नुकसान होऊन सुरकुत्या, त्वचेवर काळे डाग पडणं. त्वचा कोरडी होऊन त्वचेला भेगा पडणं या आणि इतर समस्या उद्भवू शकतात.