Summer Drink : उन्हाळ्यात प्या हे मराठमोळं कोल्ड ड्रिंक! शेफ संजीव कपूर यांनीही दिला पिण्याचा सल्ला

कोकम सरबत बनवणं अगदी सोपं आहे आणि त्यासाठी लागणारे साहित्य देखील तुमच्याकडे सहज उपलब्ध होऊ शकते. यासाठी तुम्हाला एक वाटी कोकम, अर्धी वाटी गूळ, अर्धा चमचा काळं मीठ, अर्धा चमचा भाजलेली जिरेपूड, एक चमचा सब्जा, अर्धा चमचा काळं मीठ, पाव चमचा काळी मिरी आणि अर्धा चमचा भाजलेली जिरेपूड हे साहित्य तयार ठेवा.

कोकम सरबत बनवण्यासाठी सर्वात आधीत वाटीभर कोकम फळं घेऊन ते व्यवस्थित धुवून घ्या. त्यानंतर त्यातल्या बिया काढून टाका. यानंतर त्यात एक वाटी गरम पाणी घाला आणि अर्धा तास भिजवून ठेवा. यानंतर ते मिक्सरमध्ये फिरवून त्याची बारीक पेस्ट तयार करून घ्या. आता एका कढईत अर्धी वाटी गूळ घ्या आणि त्यात अर्धी वाटी पाणी घाला. गूळ पाण्यात पूर्ण विरघळेपर्यंत हलवा. यानंतर त्यात मिक्सरमध्ये वाटून तयार केलेली कोकमची पेस्ट घाला. त्याला मंद आचेवर पाच मिनिटांपर्यंत व्यवस्थित मिक्स करून घ्या. आता त्यात अर्धा चमचा काळं मीठ, पाव चमचा काळी मिरी आणि अर्धा चमचा भाजलेली जिरेपूड घालून चांगलं मिक्स करा. आता एका गाळणीने ते एका भांड्यात व्यवस्थित गाळून घ्या.

यानंतर एक चमचा सब्जा एका वाटीत घेवून त्यात अर्धी वाटी पाणी घाला आणि ते 45 मिनिटे भिजत ठेवा. सब्जा व्यवस्थित भिजल्यानंतर आता तुम्ही सरबत तयार करायला घेऊ शकता. सरबत तयार करण्यासाठी एका ग्लासात बर्फाचे तीन ते चार तुकडे घ्या. त्यात एक मोठा चमचा कोकम सरबत घाला आणि तुम्हाला हवं असेल त्या प्रमाणात पाणी घाला. आता त्यात भिजवलेला सब्जा घाला. तुमचं चविष्ट आणि थंडगार कोकम सरबत तयार आहे. आता तुम्ही त्याचा छान फॅमिलीसोबत बसून आनंद घेऊ शकता.

शेफ संजीव कपूर यांनी देखील कोकमचे फायदे सांगितले आहेत. संजीव कपूर यांच्या मते, कोकम वजन कमी करण्यासाठी आणि पचनासाठी अतिशय उत्तम आहे. तसेच शरीराला थंडवा देणारे गुणधर्म त्यात असतात असेही ते म्हणाले. त्यामुळे तुम्ही वजन कमी करण्याचा प्रयत्न करत असाल, तुम्हाला पचनाच्या समस्या असतील किंवा उन्हाळ्यात तुम्हाला थंड पेय हवं असेल तर तुम्ही कोकम सरबत पिऊ शकता. तुम्ही कोणताही पदार्थ आंबट करण्यासाठी त्यात कोकम घालू शकता, असेही संजीव कपूर यांनी सांगितले.