Fish Recipe Video : काट्यांच्या माशांची भजी, पण काटे कसे काढायचे? सोपी ट्रिक

माशांमध्ये काटे असतात. करीमधील आणि फ्राय केलेल्या माशांमधाील काटे काढतानाच कित्येकांसाठी मुश्किल असतं. अशात काटे असलेल्या माशांची भजी, ती बनवायची कशी आणि खायची कशी असा प्रश्न बहुतेक लोकांना पडला असेल. एका महिलेने याचा व्हिडीओ सोशल मीडियावर पोस्ट केला आहे.

माशाचे तुकडे करून घ्या आणि ते वाफवून घ्या. वाफवण्यासाठी एका खोलगट भांड्यात पाणी घेऊन ते उकळून त्याच्यावर चाळणी ठेवा आणि माशाचे तुकडे या चाळणीत ठेवा. वर झाकण ठेवून 5 मिनिटं वाफवून घ्या. आता यावरील त्वचा सहजपणे निघेल. त्यानंतर तुकड्यांना थोडं दाबून पाहा तुम्हाला जिथं काटा जाणवले तो खेचून सहज बाहेर काढता येईल.

आता 3 चमचा तांदळाचं पीठ आणि 3 चमचे बेसन घ्या, मिक्स करून घ्या. आता यात चवीनुसार मीठ, पाव चमचा हळद, पाव चमचा काळी मिरी पूड, पाव चमचा चाट मसाला, अर्धा चमचा आलं-लसूण पेस्ट, एक चमचा धणे पूड, ओवा, एक-दीड चमचा लाल मसाला, बारीक चिरलेली कोथिंबीर, बारीक चिरलेला कढीपत्ता. अर्धा लिंबाचा रस, 2 टिस्पून तेल टाकून सगळं नीट मिक्स करा. थोडं थोडं पाणी टाकून भजीला करतो तितकं पातळ मिश्रण करून घ्या.

कढईत तेल गरम करायला ठेवा. तेल तापलं की माशाचे तुकडे तयार केलेल्या मिश्रणात घोळवून तेलात ड्रिप फ्राय करून घ्या. काटेवाल्या माशांची भजी तयार.

FULL THAALI युट्युब चॅनेलवर हा व्हिडीओ पोस्ट करण्यात आला आहे. महिलेने यात हलवा मासा घेतला आहे. तुम्हीसुद्धा या माशाची ही भजी ट्राय करून पाहा आणि कशी झाली आम्हाला आमच्या सोशल मीडियाच्या कमेंट बॉक्समध्ये नक्की सांगा.