तळपत्या उन्हात प्या डायट लस्सी! कोल्हापूरकरानं बनवला सीक्रेट मसाला, पिण्यासाठी होतेय गर्दी!

कोल्हापुरातील राजारामपुरी परिसरामध्ये जनता बाजार चौकात असणारी मेजर लस्सी राजू आवळे यांनी सुरू केली आहे. या लस्सीचे गोडी लस्सी आणि खारी लस्सी असे दोन प्रकार आहेत. विशेष म्हणजे खारी लस्सी ही संकल्पना कोल्हापुरात आवळे यांनीच आणली. याला डायट लस्सी असंही म्हटलं जातं. ही लस्सी खास ज्यांना मधुमेहचा त्रास आहे त्यांच्यासाठी बनवण्यात येते. ज्यांना मधुमेहाचा त्रास आहे अशा अशा लोकांना साखरेपासून लांब राहावं लागतं. मात्र त्यावर उपाय म्हणून आवळे यांनी खारी लस्सीच निर्माण केल्याचं सांगितलं. कोल्हापुरातील खारी लस्सी मिळण्याचं हे एकमेव ठिकाण आहे असं त्यांचं म्हणणं आहे.

आज पर्यंत तुम्ही गोड लस्सीचा स्वाद घेतला असेल, मात्र मेजर राजू आवळे खारी लस्सी बनवतात. त्यांच्या मेजर लस्सी स्टॉलवर ही लस्सी पिण्यासाठी मोठी गर्दी होतेय. खारी लस्सी बनवताना काळे मीठ आणि पांढरे मीठ अशा दोन प्रकारच्या मिठाचा वापर केला जातो. त्यासोबतच त्यांनी विविध प्रयोगातून तयार केलेल्या सीक्रेट मसाल्याचा वापर ते करतात. या मसाल्यामुळे या लस्सीला वेगळ्या प्रकारची चव येते. ही चव कोल्हापूरकरांच्या पसंतीस उतरलेली आहे.