ग्रीन नाही, Blue tea प्यायलाय? पिरियड्सपासून डोकेदुखीवर रामबाण, वजनही करतो कमी

जबलपूर : सकाळी बिछान्यातून उठल्यावर अनेकजणांच्या तोंडात सर्वात आधी शब्द येतो 'चहा'. भारतात दररोज सकाळी असंख्य लोक चहा पितात. कोणाला कोरा चहा आवडतो, कोणाला आल्याचा चहा आवडतो, कोणाला दुधाळ चहा आवडतो, तर कोणाला कमी साखरेचा चहा आवडतो. अनेकजण गवती चहा पितात, अनेकजण ग्रीन टी पितात, पण तुम्ही कधी ब्लू टी प्यायलाय का?

चहा हा आरोग्यासाठी हानीकारक असतो असंच आपण आतापर्यंत ऐकलं असेल, परंतु ग्रीन टी मात्र वजन नियंत्रणात राहावं म्हणून प्यायला जातो. आता ब्लू टी हा नेमका काय प्रकार आहे, पाहूया.

हा चहा गोकर्ण म्हणजेच अपराजिताच्या फुलांपासून बनवला जातो. ही फुलं औषधी गुणांनी परिपूर्ण असतात. त्यामुळे त्यांपासून बनवलेल्या या चहामध्ये अँटीऑक्सिडंट गुणधर्म भरपूर प्रमाणात असतात. परिणामी रोगप्रतिकारक शक्ती भक्कम होते. शिवाय या चहामुळे शरिरातले टाकाऊ पदार्थ बाहेर पडण्यासही मदत मिळते.

ब्लू टीमुळे डोकेदुखी, मासिकपाळीत होणारा त्रास, अंगदुखी, अशक्तपणा, विस्मरण, दमा, खोकला, इत्यादींसह मानसिक ताणावरही आराम मिळतो. महत्त्वाचं म्हणजे या चहामुळे वजनसुद्धा कमी होतं. मध्यप्रदेशच्या जबलपूर भागात अंकित राजपूत हे मागील 50 वर्षांपासून ब्लू टीचा व्यवसाय करतात. ग्राहकांकडून या चहाला मोठी मागणी मिळते. या चहाला 'सुकून टी' असंदेखील म्हणतात.