Health Tips : एवढीशी मटकी, पण फायदे तिचे भारी; आरोग्यासाठी आहे खूपच गुणकारी

ब्रिटनमधील ख्रिस्तॉस सिटास यांनी न्यूट्रिशन अँड एक्सरसाइज सायन्सेसमध्ये एमएस्सी केलं असून, त्यांना तीन वर्षांचा अनुभव आहे. त्यांच्या मते, मटकीमध्ये प्रोटीन्स आणि फायबर्स मोठ्या प्रमाणात असल्याने मटकी खाल्ल्यानंतर लगेच भूक लागत नाही. भूक नियंत्रित झाल्याने वजन कमी करण्यास उपयोग होतो. नॉन हेमिक आयर्न, फोलेट, मॅग्नेशियम, मॅंगनीज, फॉस्फरस, पोटॅशियम, थायमिन, पँटोथेनिक अ‍ॅसिड आदी अन्नद्रव्यं त्यात मोठ्या प्रमाणावर असतात.

ब्राझीलच्या लिव्हिया डिक्सन चेन यांनी न्यूट्रिशन या विषयात पीएचडी केली असून, त्यांना 11 वर्षांचा अनुभव आहे. त्यांच्या म्हणण्यानुसार, मटकी हाडांच्या मजबुतीसाठी साह्य करते. कॅल्शिअम आणि फॉस्फरसचं प्रमाण जास्त असल्याने ऑस्टिओपोरॉसिसला प्रतिबंध करण्यात आणि त्याच्याशी लढा देण्यात मटकी साह्यभूत ठरते. मटकी रोगप्रतिकार यंत्रणेत सुधारणा करते. त्यासाठी अत्यावश्यक असलेल्या झिंकचा मटकी हा उत्तम स्रोत आहे. मसल्स अर्थात स्नायू कमावण्यासाठी आणि दुखावलेले स्नायू बरे होण्यासाठी मटकीचा उपयोग होऊ शकतो. कारण मटकीतलं प्रथिन त्यासाठी उत्तम काम करतं. शाकाहारी व्यक्तींसाठी मटकी हा प्रथिनांचा उत्तम स्रोत आहे.

अर्जेंटिनामधल्या ल्युसिआना एम. चेरुबिन यांना पाच वर्षांचा अनुभव असून, त्यांनी पोषण या विषयातली पदवी घेतलेली आहे. त्यांच्या मते, मटकी ऊर्जा वाढवते. कारण त्यात असलेलं व्हिटॅमिन बी हे अन्नाचं इंधनात रूपांतर करण्यासाठी महत्त्वाचं काम करतं. स्नायू कमावण्यासाठी, तसंच दुखावलेले स्नायू बरे करण्यासाठी मटकी उपयुक्त ठरते. कॅल्शिअम आणि फॉस्फरसचा उत्तम स्रोत असल्याने मटकी ऑस्टिओपोरॉसिसला प्रतिबंध करण्यात आणि त्याच्याशी दोन हात करण्यात मदत करते.

एकंदरीतच मटकी सर्वांच्याच नियमितपणे आहारात हवी, खासकरून शाकाहारी व्यक्तींच्या आहारात तर हवीच हवी.