14 वर्षाची अविरत सेवा, पुण्यातील असंही हॉस्पिटल, मुलीचा जन्म झाल्यास घेतला जात नाही एकही रुपया

मूळचे सोलापूर जिल्ह्यातील असलेले डॉ. गणेश राख यांनी सांगितले की, काही वर्षांपूर्वी मुलींचा जन्मदर मोठ्या प्रमाणात कमी होता. अनेक ठिकाणी मुलगी असल्याचे समजताच गर्भपात केल्याच्या घटना समोर येत होत्या. हॉस्पिटल सुरू केल्यानंतर त्यांना अनेक अनुभव आले. मुलगा जन्माला आला तर कुटुंबात आनंद साजरा केला जायचा आणि खुशीने बिलही दिले जायचे. मात्र मुलगी झाली तर आई आणि बाळाला भेटायलाही कुटुंबातील कोणी येत नसायचे. बिल देण्यासाठीही टाळाटाळ केली जायची. यातूनच त्यांच्या मनात एक कल्पना आली. कुटुंब जर मुलीच्या जन्माचे स्वागत करत नसेल, तर हॉस्पिटलच्या वतीने मुलीच्या जन्माचे जंगी स्वागत करायचे आणि एक रुपयाही फी घ्यायची नाही.