आरोग्याचे छोटे शिलेदार! किचनमधील 'या' 5 बिया आहेत 'सुपरफूड', मन-मेंदू अन् हाडं होतील मजबूत

दिवसभराच्या धावपळीने येणारा ताण, थकवा आणि निद्रानाशाची समस्या तुम्हालाही सतावते का? तर मग भोपळ्याच्या बिया तुमच्यासाठीच आहेत. डॉ. पाल सांगतात की, मूठभर भोपळ्याच्या बियांमधून तुमच्या शरीराला दिवसभरासाठी लागणारे तब्बल 37% मॅग्नेशियम मिळते. हे मॅग्नेशियम स्नायूंना आराम देऊन शांत करते आणि हृदयाची गती स्थिर ठेवण्यास मदत करते. इतकेच नाही, तर यात असलेले 'ट्रिप्टोफॅन' नावाचे अमिनो ॲसिड शांत झोप देणाऱ्या हार्मोन्सची निर्मिती करते.

वजन कमी करण्याच्या प्रवासात चिया सिड्स तुमचा सर्वात चांगला मित्र ठरू शकतात. पाण्यात किंवा दुधात भिजवल्यावर या बिया जेलीसारख्या फुगतात. यामध्ये भरपूर प्रमाणात विद्राव्य फायबर (Soluble Fiber) असते, ज्यामुळे तुमचे पोट बराच काळ भरलेले राहते आणि अतिरिक्त खाणे टाळले जाते. या बिया दिवसभर तुम्हाला ऊर्जावान ठेवतात. तसेच, यात असलेले ओमेगा-3 फॅटी ॲसिड मेंदू आणि हृदयाच्या आरोग्यासाठी वरदान आहे. यामुळे पचनक्रिया सुधारते आणि कोलेस्ट्रॉल नियंत्रणात राहते.

जवसाच्या बिया (Flax Seeds) ओमेगा-3 फॅटी ॲसिडचा उत्तम स्रोत आहेत, ज्यामुळे त्या थेट तुमच्या हृदयाच्या आरोग्याशी जोडल्या जातात. यामध्ये 'लिग्नान' नावाचे एक खास तत्व असते, ज्यात अँटिऑक्सिडंट गुणधर्म आहेत. यामुळे पचनसंस्था सुधारते आणि रक्तातील कोलेस्ट्रॉलची पातळी कमी होण्यास मदत होते.

सूर्यफुलाच्या बियांमध्ये व्हिटॅमिन ई आणि सेलेनियम मुबलक प्रमाणात आढळतात. व्हिटॅमिन ई एका अँटिऑक्सिडंटप्रमाणे काम करून शरीराच्या पेशींचे नुकसान होण्यापासून संरक्षण करते. तर, सेलेनियम तुमची रोगप्रतिकारशक्ती मजबूत करून थायरॉईड ग्रंथीचे कार्य सुरळीत ठेवते.

"तीळगूळ घ्या, गोड बोला," असं आपण म्हणतोच, पण हेच तीळ तुमच्या हाडांसाठीही खूप फायदेशीर आहेत. तिळामध्ये कॅल्शियमचे प्रमाण भरपूर असल्यामुळे हाडांच्या बळकटीसाठी हा एक उत्तम पर्याय आहे. यातील आरोग्यदायी फॅट्स शरीरातील सूज कमी करतात आणि हृदयाचे आरोग्य जपतात.