किचनमधला लहानसा पदार्थ, अनेक आजार करतो नष्ट! पचन आणि मधुमेहावर लय भारी!

भरतपूर : एखाद्या पदार्थात कमी पडली तर पदार्थ बेचव होतो, जास्त पडली तर पदार्थात कडवटपणा येतो, अशी ही चिमूटभर हळद म्हणजे किचनमधला अतिमहत्त्वाचा पदार्थ. शिवाय विविध आजारांवरही हळद रामबाण असते. कुठे जरा खरचटलं जरी तरी आपण तिथे लगेच हळद लावतो. शिवाय हळदीचं सेवन आरोग्यासाठी अत्यंत फायदेशीर असतं. म्हणूनच एका टोकापासून दुसऱ्या टोकापर्यंत देशभरात सगळीकडे फोडणीत हळदीचा वापर होतो.

आयुर्वेदिक डॉक्टर चंद्र प्रकाश दीक्षित यांनी हळदीचे फायदे सविस्तरपणे सांगितले आहेत. जखमेवर हळद लावल्यास रक्तस्त्राव ताबडतोब थांबतो आणि जखमही लवकर भरते, असं डॉक्टर सांगतात. शिवाय हळदीत अँटीसेप्टिक आणि अँटीबायोटिक गुणधर्म असल्यामुळे त्या जागचं दुखणंही लवकर थांबतं. अंगदुखी बरी होत असल्याने विशेषतः हिवाळ्यात हळदीचं सेवन करण्याचा सल्ला दिला जातो. कारण हिवाळ्यात हात-पाय आखडतात. त्यामुळे आपण हळद घातलेलं गरम दूध पिऊ शकता.