Condom : युद्धसुरु असताना कंडोमची मागणी अचानक का वाढते? कारण लैंगिक आरोग्य नाही तर काहीतरी वेगळंच

युद्धभूमीवर सैनिकाचा सर्वात मोठा सोबती म्हणजे त्याची रायफल. पण वाळवंटातील धूळ, माती किंवा पावसाळ्यातील ओलावा यांमुळे रायफलच्या नळीत कचरा अडकून ती निकामी होऊ शकते. अशा वेळी सैनिक रायफलच्या तोंडावर कंडोम चढवतात. हे मटेरियल इतकं पातळ असतं की, गरज पडल्यास कंडोम न काढताही गोळी झाडता येते आणि नेमबाजीवर त्याचा कोणताही परिणाम होत नाही.

रणभूमीवर नकाशे, बॅटरी, माचिस आणि दळणवळणाची साधने सुरक्षित ठेवणं हे जगण्या-मरण्याचा प्रश्न असतो. मुसळधार पाऊस किंवा नदी पार करताना या वस्तू ओल्या झाल्यास मोठा धोका निर्माण होऊ शकतो. कंडोम हे वॉटरप्रूफ आणि लवचिक असल्याने सैनिक या वस्तू कंडोममध्ये पॅक करतात. यामुळे कितीही पाणी असलं तरी आतील साहित्य पूर्णपणे कोरडं राहतं.

कंडोमचा वापर केवळ जमिनीवरच नाही तर पाण्यातही प्रभावी ठरला आहे. 1971 च्या भारत-पाकिस्तान युद्धादरम्यान भारतीय नौदलाने एक अनोखी शक्कल लढवली होती. लिम्पेट माईन्स वॉटरप्रूफ करण्यासाठी कंडोमचा वापर करण्यात आला होता. यामुळे स्फोटकांचा टायमिंग मेकॅनिझम पाण्यातही कोरडा राहिला आणि भारतीय नौदलाला यशस्वी मोहीम फत्ते करता आली.

जेव्हा प्रत्यक्ष युद्ध सुरू असतं, तेव्हा अनेकदा वैद्यकीय साहित्याचा तुटवडा जाणवतो. अशा आणीबाणीच्या प्रसंगी कंडोमचा वापर इमर्जन्सी ग्लोव्हज म्हणून किंवा जखमेवर वॉटरप्रूफ कव्हर म्हणून केला जातो. यामुळे जखमेत जंतू शिरत नाहीत आणि संसर्गाचा धोका कमी होतो.

ज्या वस्तूला आपण फक्त एका विशिष्ट नजरेने पाहतो, तीच वस्तू युद्धभूमीवर सैनिकांचे प्राण वाचवण्यासाठी आणि शस्त्रे सुरक्षित ठेवण्यासाठी मल्टिपर्पज टूल म्हणून वापरली जाते. म्हणूनच युद्ध सुरू झाल्यावर कंडोमची सप्लाय चेन विस्कळीत होते आणि किमती वाढू लागतात.