Pune Hiring Racket: पुण्यात IT नोकरीचा महाघोटाळा, पैसे भरून नोकरीची धक्कादायक मोडस ऑपरेंडी; शेकडो तरुणांना लुटले, मुख्यमंत्र्यांकडून SIT चौकशी

Published by:Jaykrishna Nair

Last Updated:Mar 31, 2026 4:10 PM IST

Pune IT Job Scam: पुण्यात आयटी नोकरीच्या नावाखाली मोठा घोटाळा उघडकीस आला असून शेकडो तरुणांकडून लाखो रुपये उकळल्याचा आरोप आहे.

इम्पॅक्ट शॉटतुमचा गेटवे लेटेस्ट न्यूज

Translate

पुणे : नोकरीच्या शोधात असलेल्या तरुणांची फसवणूक करणारा मोठा आयटी घोटाळा पुण्यात उघडकीस आला आहे. नोकरी मिळवण्यासाठी लाखो रुपये मोजले, पगार मिळाला नाही, अनुभव पत्र नाही आणि पैसेही परत नाही अशा भयंकर परिस्थितीत पुण्यातील शेकडो IT तरुण सापडले आहेत.

'मनीकंट्रोल'ने दिलेल्या वृत्तानुसार क्वांटम सॉफ्ट टेक्नॉलॉजीज, फ्लायनॉट सास आणि डेटाटेक लॅब्स या तीन कंपन्यांसह पुण्यातील किमान 10 IT कंपन्यांवर नोकरीच्या नावाखाली फसवणूक केल्याचे आरोप आहेत. पोलीस तपास सुरू असून मुख्यमंत्री देवेंद्र फडणवीस यांनी SIT स्थापन करण्याचे आदेश दिले आहेत.

श्रृष्टीची कहाणी

27 वर्षीय श्रृष्टी (नाव बदलले आहे) दोन वर्षे नोकरीच्या शोधात होती. सप्टेंबरमध्ये एका हायरिंग कन्सल्टंटने तिला QuantumSoft मध्ये नोकरीची ऑफर दिली. 6 लाख वार्षिक पॅकेजसाठी 2.5 लाख आणि 11 लाख पॅकेजसाठी 3.25 लाख रुपये भरण्यास सांगितले.

श्रृष्टी म्हणाली, मी 11 LPA साठी पहिला हप्ता म्हणून 2.75 लाख भरले. उरलेले पगार सुरू झाल्यावर भरणार होते. ऑक्टोबरमध्ये ती रुजू झाली, एक महिना काम केले पहिला पगार मिळाला आणि तोच शेवटचा ठरला. जानेवारीत पैसे परत मागितले तेव्हा तातडीने राजीनामा दे तरच पैसे परत मिळतील असे सांगण्यात आले. आतापर्यंत फक्त 1.45 लाख परत मिळाले असून उर्वरित रक्कम अद्याप बाकी आहे.

धृवने नातेवाईकांकडून कर्ज काढले

यवतमाळचा 25 वर्षीय धृव (नाव बदलले आहे) हा 2022 चा पदवीधर. दोन वर्षांपेक्षा अधिक काळ नोकरी शोधत होता. ऑक्टोबर 2025 मध्ये QuantumSoft ची ऑफर आली. धृव म्हणाला, एका जॉब पोर्टलवरून कन्सल्टंटने मला संपर्क केला. 6 LPA साठी सुमारे 3 लाख रुपये भरावे लागले. नातेवाईकांकडून उधार घेऊन आणि कर्ज काढून पैसे जमवले. आज धृव आणि श्रृष्टी यांच्यासह 100 कर्मचाऱ्यांनी विमान नगर पोलीस ठाण्यात तक्रार दाखल केली असून आणखी 300 कर्मचारी तक्रार दाखल करण्याच्या तयारीत आहेत.

फसवणुकीची पद्धत काय होती?

दोन्ही कंपन्यांमध्ये एक समान सूत्र आढळले. QuantumSoft आणि Flynaut SaaS या कंपन्यांमध्ये जवळपास 900 ते 1,000 कर्मचारी होते. हायरिंग कन्सल्टंटांकडून 1.5 लाख ते 3.5 लाख रुपये फी आकारली जात होती आणि ती कंपनीच्या व्यवस्थापनाशी वाटली जात होती.

या घोटाळ्यात किमान 30 हायरिंग कन्सल्टंट आणि कन्सल्टिंग फर्म्स सहभागी असल्याचे IT कर्मचारी संघटना FITE ने सांगितले. बळी पडलेले बहुतांश तरुण हे 2022-24 च्या बॅचचे महाराष्ट्रातील लहान शहरांतील यवतमाळ, अमरावती, नागपूर, अहमदनगर पदवीधर होते. त्यांच्याकडे BSc IT, MCA किंवा अभियांत्रिकीच्या पदव्या होत्या, मात्र नोकरी मिळत नव्हती.

Flynaut SaaS विरोधात 354 गुन्हे, 600 हून अधिक बळी

Flynaut SaaS विरोधात हिंजेवाडी पोलीस ठाण्यात 354 हून अधिक FIR दाखल झाल्या आहेत. 600 हून अधिक कर्मचारी बाधित झाले आहेत.

एका MCA पदवीधराने सांगितले की, नोव्हेंबर 2024 मध्ये मुलाखतीसाठी बोलावले होते. 10-12 उमेदवार होते. मुलाखत बनावट वाटत होती. तांत्रिक प्रश्न जवळपास नव्हतेच. काही उमेदवारांना तर विचारलेच नाही. तरीही सर्वांना नोकरी देऊ केली. किती पगार हवा त्यानुसार किती पैसे भरायचे ते सांगितले.

या कर्मचाऱ्याने जानेवारी 2025 मध्ये रुजू होऊन दोन महिने प्रशिक्षण घेतले, मार्चमध्ये पूर्ण पगार मिळाला. त्यानंतर प्रोजेक्टवर नियुक्त होण्यासाठी परीक्षा घेण्यात आली. कंपनी बहुतांश कर्मचाऱ्यांना नापास करत होती आणि कोणालाही प्रत्यक्ष प्रोजेक्ट दिला नाही. एप्रिलपासून पगारच बंद झाला. HR आणि वरिष्ठांशी संपर्क साधण्याचा प्रयत्न केला तेव्हा संपर्क ब्लॉक करण्यात आला.

हिंजेवाडी पोलीस ठाण्याचे तपास अधिकारी हृषिकेश घाडगे म्हणाले, कंपनीच्या खात्यात पैसेच नव्हते. नव्याने रुजू झालेल्या कर्मचाऱ्यांनी भरलेले पैसे दागिने, गाड्या आणि घरे खरेदीसाठी वापरले गेले. Flynaut चे CEO उपेश पाटील आणि संचालक रोहन आंबुलकर (नागपूर निवासी) हे सध्या आठ महिन्यांपासून न्यायालयीन कोठडीत आहेत.

QuantumSoftकडून 1 कोटींची फसवणूक

QuantumSoft चे संस्थापक व CEO निखिलेश्वर क्षीरसागर गेल्या चार महिन्यांपासून अटकेत आहेत. तपासात समोर आले की ते प्रोजेक्ट मिळण्याच्या अपेक्षेने बल्कमध्ये भरती करत होते. एका कर्मचाऱ्याने सांगितले की, 2025च्या अखेरीस एक-दोन महिन्यांत कर्मचारी संख्या 200 वरून जवळपास 1,000वर गेली.

आतापर्यंत दाखल झालेल्या 100 हून अधिक FIR नुसार या कंपनीने सुमारे 1 कोटी रुपये गोळा केल्याचे तक्रारदारांचे म्हणणे आहे. पगाराबद्दल विचारणा करणाऱ्या कर्मचाऱ्यांना बडतर्फ केले जात होते. एका कर्मचाऱ्याने सांगितले की, एका सहकाऱ्याने आईच्या कॅन्सर उपचारासाठी आरोग्य विमा चौकशी केली आणि त्याला लगेच काढून टाकले.

DataTech Labsमधील 60 कर्मचाऱ्यांचा पगार अडकला

बावधन पोलीस ठाण्यात DataTech Labs विरोधात FIR दाखल आहेत. CEO अमित आंद्रे यांनी काही कर्मचाऱ्यांचे पगार दिल्याने अटक टळली. मात्र अजूनही 60 कर्मचाऱ्यांचे पगार बाकी आहेत.

माजी HR कर्मचाऱ्यालाही स्वतःचे पगार मिळवण्यासाठी पोलीस तक्रार करावी लागली. DataTech Labs ने स्वेच्छेने राजीनामा देणाऱ्यांना अनुभव पत्रे नाकारली आणि त्यांच्यावर डेटा उल्लंघनाचे आरोप लावले. कर्मचारी म्हणाले, "बहुतांश नव्याने रुजू झालेले होते. पगार न मिळाल्याने जेवणाचेही पैसे नव्हते.

CEO आंद्रे यांनी सर्व आरोप फेटाळले. ते म्हणाले हे आरोप निराधार, पक्षपाती आणि आमची बदनामी करण्यासाठी केलेले आहेत. आम्ही नैतिक आचरण आणि कायदेशीर प्रक्रियेस वचनबद्ध आहोत.

कर्मचाऱ्यांचे भविष्य अंधारात

या प्रकरणामुळे कर्मचाऱ्यांसमोर अनेक गंभीर समस्या उभ्या राहिल्या आहेत. PF खाती निष्क्रिय असल्याने नव्या नोकरीत Background Verification मध्ये अडथळे येत आहेत. एका QuantumSoft कर्मचाऱ्याला Tier-I IT कंपनीत नोकरी मिळाली, पण PF खाते अडकल्याने Onboarding थांबले आहे. महिनोन महिने अनुभव अवैध ठरत आहे. नोकरी मिळवण्यासाठी सोने विकले, कर्ज काढले, नातेवाईकांकडे हात पसरले आणि आता हातात काहीच नाही.

IT क्षेत्रातील मोठी समस्या

FITE चे अध्यक्ष पवनजित माने म्हणाले TCS, Infosys, Wipro सारख्या मोठ्या कंपन्यांनी गेल्या काही वर्षांत भरती कमी केली. त्यामुळे मोठ्या संख्येने पदवीधर बाजारात आले आणि त्यांना पर्यायच उरला नाही. ते पुढे म्हणाले हे कन्सल्टंट तांत्रिकदृष्ट्या सक्षम नाहीत. मोठ्या कंपन्यांकडे ते उमेदवार पाठवण्याची क्षमता नाही. ते फक्त नोकरी शोधणाऱ्यांचे शोषण करत राहतील.

सरकार आणि पोलिसांची कारवाई

मुख्यमंत्री देवेंद्र फडणवीस यांनी विधानसभेत आमदार शंकर जगताप यांनी हा मुद्दा उपस्थित केल्यानंतर Flynaut प्रकरणात SIT स्थापन करण्याचे आदेश दिले. राज्य सरकार IT क्षेत्रातील कर्मचाऱ्यांच्या तक्रारींसाठी स्वतंत्र न्यायाधिकरण स्थापन करणार आहे.

पुण्याचे उपकामगार आयुक्त निखिल वाळके म्हणाले, हे प्रकरण मुख्यतः गुन्हेगारी स्वरूपाचे असून पोलिसांच्या कक्षेत येते. कामगार कायदे उल्लंघनाबाबत तपास पूर्ण झाल्यावर आम्ही कारवाई करू.

view comments

Location :

Mumbai,Maharashtra

First Published :

Mar 31, 2026 4:10 PM IST

Pune Hiring Racket: पुण्यात IT नोकरीचा महाघोटाळा, पैसे भरून नोकरीची धक्कादायक मोडस ऑपरेंडी; शेकडो तरुणांना लुटले, मुख्यमंत्र्यांकडून SIT चौकशी