Metro-3: दक्षिण मुंबईचा प्रवास होणार सुस्साट! 'या' दिवशी होणार मेट्रो-3च्या शेवटच्या टप्प्याचं उद्घाटन

याबाबत मिळालेल्या माहितीनुसार, मुंबईतील पहिल्या भुयारी मेट्रोचं बांधकाम आणि संचालनाची जबाबदारी मुंबई मेट्रो रेल कॉर्पोरेशनवर (एमएमआरसी) आहे. एमएमआरसीने, 33.5 किलोमीटर मेट्रो मार्गिकेतील आरे ते बीकेसी हा टप्पा ऑक्टोबर 2024 मध्ये तर बीकेसी ते आचार्य अत्रे चौक टप्पा मे 2025 मध्ये कार्यान्वित केला आहे. आता या मार्गिकेतील आचार्य अत्रे चौक ते कफ परेड हा शेवटचा टप्पा देखील नागरिकांच्या सेवेत येणार आहे.

शेवटच्या टप्प्यामुळे दक्षिण मुंबईतील अत्यंत गर्दीची ठिकाणे मेट्रोने जोडली जाणार आहेत. त्यामुळे अशा ठिकाणी अतिजलद पोहचणे प्रवाशांना सोपे होणार आहे. सरकारी, खासगी कार्यालयांची संख्या ज्या चर्चगेट, सीएसएमटी, कफ परेड आदी भागात आहे त्या भागांना जोडणारी ही पहिली मेट्रो मार्गिका असणार आहे.

आरे ते आचार्य अत्रे चौक हा टप्पा कार्यान्वित झाल्यापासून प्रवाशांना दादर, प्रभादेवी, वरळी गाठण्यासाठी नवीन पर्याय उपलब्ध झाला आहे. तर आता लवकरच महालक्ष्मी, गिरगाव, काळबादेवी, सीएसएमटी, हुतात्मा चौक, चर्चगेट, विधान भवन, कफ परेड गाठता येणार आहे.