अहिल्यानगरमध्ये भरवस्तीत बिबट्या घुसला, 4 तासांनंतर वन विभागानं पकडलं, रेस्क्यूचा थरारक VIDEO

सामाजिक कार्यकर्त्यांनी वन विभाग आणि पोलिसांना भरवस्तीत बिबट्या घुसल्याची माहिती दिली. अहिल्यानगर शहरालगतच्या भिंगार परिसरात सकाळपासून बिबट्याचा मुक्त संचार पाहायला मिळाल्याने नागरिकांमध्ये भीती पसरली होती. त्याला पाहायचंही होतं पण हल्ला केला तर... या भीतीपोटी सगळे घाबरून होते. अखेर पोलीस आणि वन विभागाचे अधिकारी आले तेव्हा जीवात जीव आला.

वडारवाडी, नागरदेवळे भागात बिबट्याचा वावर दिसून आल्यानंतर पोलिस आणि वनविभागाला तातडीने पाचारण करण्यात आलं, चार ते पाच तासांच्या अथक प्रयत्नानंतर अखेर बंद पडलेल्या घरात अडकलेल्या या बिबट्याला यशस्वीपणे पकडण्यात आलं आहे. भर नागरी वस्तीत बिबट्या शिरल्याने भिंगार परिसरात एकच खळबळ उडाली होती. सध्या बिबट्या हनुमान मंदिर परिसरात असल्याची माहिती मिळताच भिंगार कॅम्प पोलीस आणि नगर तालुका पोलीस तात्काळ घटनास्थळी दाखल झाले.

सकाळपासून सुरू असलेल्या शोध मोहिमेदरम्यान नागरिकांनीही सतर्कता दाखवत वनविभाग प्रशासनाला माहिती दिली. भिंगार परिसरात पहिल्यांदाच नागरी वस्तीत बिबट्या आढळल्याने नागरिक भयभीत झाले होते. अखेर बंद घरात अडकलेल्या बिबट्याला वनविभागाच्या पथकाने भूल इंजेक्शन देत सुरक्षितपणे ताब्यात घेतलं. बिबट्या घरात अडकलेला होता. वनविभागाच्या मदतीने त्याला भूल देऊन सुरक्षित पकडलं. सध्या बिबट्या पूर्णपणे सुरक्षित आहे. अचानक बिबट्या दिसल्यामुळे परिसरात भीतीचं वातावरण होतं. प्रशासनाने वेळीच कारवाई केल्यामुळे मोठा अनर्थ टळला.