Ajit Pawar : भाजप पदाधिकाऱ्याची खदखद, अजितदादा ऍक्शन मोडमध्ये, थेट पुण्यात फोन केला अन्...

पुणे : भाजप आमदार राहुल कुल यांच्यासमोरच भाजपचे पुणे जिल्हा उपाध्यक्ष आणि पुणे बाजार समितीचे संचालक सुदर्शन चौधरी यांनी शिरूर लोकसभा आढावा बैठकीमध्ये त्यांची खदखद बोलून दाखवली. अजित पवारांना महायुतीतून बाहेर काढा, अजित पवारांनी भाजप कार्यकर्त्यांवर अन्याय केला आहे. अजित पवार सत्तेत असतील तर आम्हाला सत्ता नको, पुण्याचे पालकमंत्री म्हणून अजित पवार आमच्या बोकांडी आले, अशी टीका सुदर्शन चौधरी यांनी केली.

पुणे जिल्हा भाजप पदाधिकाऱ्यांनी केलेल्या या वक्तव्याची माहिती अजित पवारांनीही घेतली आहे. नेमक्या नाराजीचं कारण काय? याबाबत अजित पवारांनी जाणून घेतलं. तसंच विनाकारण युतीत वाद नको, अशी भूमिका अजित पवारांनी घेतली. तसंच पुणे जिल्ह्यातील भाजप पदाधिकारी बैठकीला जे उपस्थित होते, त्यांच्याकडून अजित पवारांनी माहिती घेतली.