महिलांना मेट्रो आणि PMPML बस प्रवास मोफत, पिंपरी चिंचवडकरांसाठी अजितदादांचे हमीपत्र

पुणे : अजित पवार यांच्या नेतृत्वात झेपावलेले पिंपरी चिंचवड शहर भाजपच्या ताब्यात गेल्याने ते पुन्हा मिळविण्यासाठी राष्ट्रवादीने कंबर कसली आहे. २०१७ पर्यंत अजित पवार यांचे शहरावर एकहाती वर्चस्व होते. मात्र तत्कालिन आणि आताचेही मुख्यमंत्री देवेंद्र फडणवीस यांनी अतिशय सूक्ष्म रणनीती आखून अजित पवार यांचे वर्चस्व ठरवून मोडित काढले. अजित पवार यांच्याच एकेकाळच्या सहकाऱ्यांना भाजपमध्ये आणून फडणवीस यांनी आव्हान उभे केले. दरम्यानच्या पाच वर्षात पुलाखालन बरेच पाणी वाहून गेले आहे. सध्या सत्तेत एकत्र असले तरी पिंपरी चिंचवड महापालिका आपल्याच ताब्यात ठेवण्यासाठी राष्ट्रवादी विरुद्ध भाजपमध्ये निकराची लढाई होत आहे.