उच्चशिक्षित तरुणाची कमाल! विदर्भात फुलवली जिरॅनियमची शेती; करतोय लाखोंची कमाई

यश गणोरकर याने एमएससीची (इंडस्ट्रिअल केमिस्ट्री) पदव्युत्तर पदवी घेतलेली आहे. तर मुक्‍त विद्यापीठातून दूरस्थ शिक्षण पद्धतीने एमबीए (मार्केटिंग) देखील तो करतो आहे. यश गणोरकर याची वडिलोपार्जित 3 एकर शेती आहे. त्याचे वडील शेतीच करतात. संत्रा हेच त्यांचे मुख्य पीक. एकेदिवशी नगर-शिर्डी भागात यशला जिरॅनियमची शेती आणि तेलनिर्मिती युनिट पाहण्यास मिळाले. उत्सुकतेने तेथे जाऊन पाहणी केली. हा प्रयोग आवश्यक वाटल्याने तेथे तो दोन दिवस राहिला देखील. घरी परतल्यावर त्याने या प्रयोगाची संकल्पना वडिलांना सांगितली. मात्र आपल्या भागात हा प्रयोग म्हणजे मोठी जोखीम वाटून वडिलांनी त्यास नकार दिला. पण जिद्दी यशने त्यांना शिर्डी भागात नेत हा प्रयोग प्रत्यक्ष दाखवत त्याचे महत्त्व पटवून दिले.