Chhatrapati Sambhajinagar : हुंदके देत रडला, निरागस असल्याचा आव आणला, 4 लाख चोरणारा नोकर कुठं फसला?

‎

‎फरदीन रफिक शेख 25, रा. दादा कॉलनी, कैलासनगर असे अटक करण्यात आलेल्या आरोपीचे नाव आहे. तो आनंद अग्रवाल यांच्या दुकानात काम करतो. ५ नोव्हेंबर रोजी मालकाला भिशीतून मिळालेली चार लाखांची रक्कम आणण्यासाठी अग्रवाल यांनी फरदीनला शहागंज येथील एका दुकानात पाठवले होते. पैसे घेऊन परतताना जालना रोडवरील तनिष्क ज्वेलर्ससमोर दुचाकीवर आलेल्या दोघांनी चाकूचा धाक दाखवून पैसे पळवल्याची तक्रार त्याने जिन्सी पोलिसांकडे दाखल केली होती.

‎

‎घटनेचे गांभीर्य लक्षात घेत पोलिस निरीक्षक शिवाजी बुधवंत यांनी तातडीने तपासाची चाके फिरवली. सहायक निरीक्षक गौतम वावळे, उपनिरीक्षक गणेश माने तसेच पथकाने तांत्रिक विश्लेषण, घटनास्थळाचा अभ्यास आणि आरोपीची पार्श्वभूमी तपासली. तेव्हा फरदीनवर दीड लाखांचे कर्ज असल्याची माहिती समोर आली आणि संशयाची सुई त्याच्याच दिशेने वळली. चौकशीत कठोर भूमिका घेताच फरदीनने गुन्ह्याची कबुली दिली.

‎

‎पोलीस तपासात उघड झाले की, लुटीचा बनाव रचण्यापूर्वी फरदीनने दोन मित्रांशी संगनमत करून कट आखला होता. ठरल्याप्रमाणे त्याच्याच साथीदारांनी दुचाकीवरून पैसे घेऊन पलायन केले.आरोपीला न्यायालयात हजर केले असता ९ नोव्हेंबरपर्यंत पोलिस कोठडी सुनावण्यात आली आहे. गुन्ह्यातील संपूर्ण रक्कम पोलिसांनी जप्त केली असल्याची माहिती निरीक्षक बुधवंत यांनी दिली.

‎

‎काही दिवसांपूर्वी उस्मानपुरा परिसरातही अशाच प्रकारे चालकाने लुटीचे नाटक रचले होते. त्या घटनेप्रमाणेच जिन्सी पोलिसांनीही हा गुन्हा झपाट्याने उलगडून दाखवत तपासातील तत्परतेचे पुन्हा एकदा उदाहरण घालून दिले आहे.

‎