फलटण महिला डॉक्टर मृत्यू प्रकरणात नवा ट्विस्ट, 5 महिन्यानंतर PSI गोपाल बदने येणार तुरुंगाबाहेर, कोर्टाचा मोठा निर्णय

२३ ऑक्टोबर २०२५ रोजी फलटणमधील एका हॉटेलमध्ये महिला डॉक्टरने गळफास घेऊन आपली जीवनयात्रा संपवली होती. या घटनेने संपूर्ण परिसरात मोठी खळबळ उडाली होती. या प्रकरणात पोलिसांना घटनास्थळी एक धक्कादायक पुरावा सापडला होता. संबंधित महिला डॉक्टरने मृत्यूपूर्वी स्वतःच्या हातावर पीएसआय गोपाळ बदने आणि प्रशांत बनकर या दोघांची नावे लिहिली होती.

"गोपाळ बदने आणि प्रशांत बनकरने आपला शारीरिक आणि मानसिक छळ केला आहे," असा गंभीर आरोप त्या डॉक्टरने केला होता. या पुराव्याच्या आधारे फलटण पोलिसांनी गुन्हा दाखल करत पीएसआय गोपाळ बदने आणि प्रशांत बनकर या दोघांना अटक केली होती.

अटकेनंतर गेल्या पाच महिन्यांपासून गोपाळ बदने कारागृहात होता. जामीनासाठी त्याने मुंबई उच्च न्यायालयाच्या कोल्हापूर सर्किट बेंचमध्ये अर्ज केला होता. या अर्जावर सुनावणी दरम्यान सरकार पक्ष आणि बदने यांच्या वकिलांनी आपापली बाजू मांडली. दोन्ही बाजूंचा सविस्तर युक्तिवाद ऐकून घेतल्यानंतर, न्यायालयाने काही अटी व शर्तींसह पीएसआय गोपाळ बदने याला जामीन मंजूर करण्याचा निर्णय दिला.

या प्रकरणातील मुख्य आरोपी असलेल्या गोपाळ बदने याला जामीन मिळाल्यामुळे आता खटल्याच्या पुढील सुनावणीकडे सर्वांचं लक्ष लागलं आहे. दरम्यान, या प्रकरणात प्रशांत बनकर याच्यासह इतर बाबींचा तपासही पोलीस प्रशासनाकडून सुरू आहे.