Video: शाळेच्या भिंतीही लागल्या बोलू.., कोरोना काळातील अनोख्या कामासाठी शिक्षकाला मोठं बक्षीस

शिक्षण क्षेत्रात उल्लेखनीय कामगिरी करणाऱ्या शिक्षकांचा सन्मान आणि गौरव व्हावा यासाठी राज्य सरकारच्या वतीने विविध पुरस्कार दिले जातात. बीड जिल्ह्यातील ताडसोन्ना या गावातील जिल्हा परिषद शाळेमधील शिक्षक महेश गाडे यांना नुकताच क्रांतीज्योती सावित्रीमाई फुले राज्यशिक्षक गुणगौरव पुरस्कार जाहीर झाला. कोविड काळामध्ये शिक्षण कार्य अबाधित ठेवताना BALA -building as learning aid हा नवोपक्रम राबविला. त्यांच्या या कार्याची दखल घेत राज्य सरकारने त्यांचा गौरव केला आहे.

कोविड लॉकडाऊनच्या कालावधीमध्ये शिक्षक शाळेत जात होते. पण विद्यार्थी शाळेमध्ये येत नव्हते. ही परिस्थिती असताना मी व माझे सहकारी शिक्षक गोडबोले सर व शेळके सर यांना सोबत घेऊन बाला उपक्रमाचे आयोजन केले. या उपक्रमांतर्गत आम्ही सर्वांनी स्वखर्चाने स्वतः हातात पेंट ब्रश घेऊन शाळेच्या सर्व भिंती कोपरे व शाळेचे सर्वच भाग या ठिकाणी शैक्षणिक साधनांची निर्मिती केली. यामध्ये सर्वच विषयाचे शैक्षणिक साहित्य भिंतीवर स्वतः पेंट करून शाळेच्या भिंती बोलक्या केल्या. यामुळे विद्यार्थ्यांसाठी आवश्यक असणाऱ्या सर्व संकल्पना नकळत विद्यार्थी वाचू लागले व त्या सर्व संकल्पना त्यांना सहजपणे पाठ होऊन गेल्या, असे शिक्षक सांगतात.

या उपक्रमांतर्गत शाळेच्या भिंतीच बोलक्या झाल्या. इंग्लिश, गणित, इतिहास, भूगोल, विज्ञान सर्व भाषा विषय व त्या विषयाशी संबंधित सर्व कृती विद्यार्थ्यांच्या सतत दृष्टिक्षेपात राहिल्या. त्यामुळे त्यांना या उपक्रमाचा वेगळा अभ्यास करण्याची गरज राहिली नाही. या उपक्रमामुळे शाळेची इमारत विद्यार्थी स्नेही बनली तसेच शालेय परिसर विद्यार्थ्यांसाठी पूरक बनला. या उपक्रमासाठी मी तन-मन-धन या तीनही स्वरूपात योगदान देऊन सर्व विद्यार्थ्यांसाठी अध्ययन सुकर वातावरण निर्मिती केली, असे शिक्षक गाडे सांगतात.